Xalq deputatlari Qo‘qon shahar Kengashi kotibiyati mudiri, Shayxon mahallasi bo‘yicha deputat A.Nosirov tomonidan o‘zi saylangan hudud — "Shayxon" mahalla fuqarolar yig‘inida ko‘cha boshilari bilan navbatdagi uchrashuv tashkil etildi.

Uchrashuv davomida mahallada mavjud dolzarb muammolar, aholini qiynab kelayotgan masalalar hamda ularni bartaraf etish yuzasidan amalga oshirilishi lozim bo‘lgan chora-tadbirlar atroflicha muhokama qilindi. Xususan, ichki ko‘chalar holati, elektr va ichimlik suvi ta’minoti, obodonlashtirish ishlari, ko‘cha yoritgichlari, infratuzilmani rivojlantirish hamda ijtimoiy himoyaga muhtoj fuqarolar bilan ishlash masalalari yuzasidan ko‘cha boshilarining fikr va takliflari tinglandi.

Shuningdek, deputat tomonidan fuqarolar murojaatlarini tizimli ravishda o‘rganish, muammolarni ustuvorlik asosida hal etish hamda mas’ul tashkilotlar bilan hamkorlikni kuchaytirish bo‘yicha amalga oshirilayotgan ishlar haqida ma’lumot berildi. Har bir ko‘tarilgan masala yuzasidan tegishli tashkilotlarga murojaat qilish, zarur hollarda deputatlik nazorati va deputatlik so‘rovi mexanizmlaridan samarali foydalanish ta’kidlandi.

Uchrashuv yakunida mahalla hududini yanada obod qilish, fuqarolar uchun qulay yashash sharoitlarini yaratish hamda mavjud muammolarni bosqichma-bosqich bartaraf etish yuzasidan kelgusidagi vazifalar belgilab olinib, ko‘cha boshilari bilan hamkorlikni izchil davom ettirishga kelishib olindi.

Xalq deputatlari Qo‘qon shahar Kengashi