#deputat_soʻrovi #poytaxtdeputatlari #deputatlik_faoliyati

❗️ Yakkasaroy tumanidagi elektr ta’minoti va xavfsizlik masalasi deputatlik so‘rovi orqali ko‘tarildi

🏛 Xalq deputatlari Toshkent shahar Kengashi deputati Vasila Alimova tomonidan Yakkasaroy tumani “Rakat” mahalla fuqarolar yig‘ini Muqumiy ko‘chasi 96/6-uy aholisi murojaati asosida Toshkent shahar hokimligi nomiga deputatlik so‘rovi yuborildi.

📩 Murojaatda mazkur hududda joylashgan elektr uzatish tayanchi (stolba) uzoq yillardan buyon eskirgani, elektr simlari tartibsiz holatga kelib qolgani hamda ularning osilib turishi natijasida aholi xavfsizligiga jiddiy xavf tug‘dirayotgani qayd etilgan.

🔎 Deputat tomonidan olib borilgan o‘rganishlar davomida elektr uzatish tayanchining texnik jihatdan eskirgani, elektr simlari amaldagi texnik talablarga muvofiq tartibga keltirilmagani hamda favqulodda holatlar yuzaga kelish ehtimoli mavjudligi aniqlangan. Mazkur holat fotosuratlar bilan ham tasdiqlanib, deputatlik so‘roviga ilova qilingan.

🗣 Shuningdek, ushbu hududda Xalq deputatlari Toshkent shahar Kengashining tegishli qarori ijrosi doirasida bolalar maydonchasini qurish ishlari boshlanganligi sababli elektr tarmoqlarini xavfsiz holatga keltirish masalasi yanada dolzarb ekani ta’kidlangan.

📝 Shu munosabat bilan deputat Vasila Alimova “Xalq deputatlari viloyat, tuman va shahar Kengashi deputatining maqomi to‘g‘risida”gi Qonunning 5 va 8-moddalariga asosan Toshkent shahar hokimligidan mazkur manzildagi elektr uzatish tayanchining texnik holatini mutaxassislar ishtirokida o‘rganish, zarurat bo‘lsa eskirgan tayanchni yangisiga almashtirish, elektr simlarini amaldagi texnik me’yorlar asosida tartibga keltirish, elektr tarmoqlariga xavf tug‘dirayotgan daraxt shoxlarini sanitariya qoidalariga muvofiq butalash hamda amalga oshirilgan ishlar yuzasidan 10 kun muddatda yozma ma’lumot taqdim etishni so‘radi.

🔺 Mazkur masala aholi xavfsizligini ta’minlash, elektr ta’minotining uzluksiz ishlashi hamda hududdagi obodonlashtirish ishlarini sifatli tashkil etish nuqtayi nazaridan deputat tomonidan nazoratga olingan.

📱 Telegram 📱 Instagram 📱 Facebook 📱 YouTube 🔎 E-kengash