ФУҚАРОЛАРНИНГ МУРОЖААТЛАРИ КЎРИБ ЧИҚИЛДИ
Бугун туман ҳокими, Халқ депутатлари Янгиқўрғон тумани Кенгаши депутати Нажмиддинов Асадулла Икромовичнинг ўзи сайланган сайлов округида навбатдаги фуқаролар қабули бўлиб ўтди.
Қабул давомида фуқароларни қийнаб келаётган турли ижтимоий-иқтисодий ва ҳуқуқий масалалар юзасидан мурожаатлар қабул қилиниб, уларнинг ҳар бири алоҳида тартибда кўриб чиқилди.
Хусусан, ер муносабатлари, таълим контракти тўловини амалга ошириш, тўй маросимини ўтказиш учун моддий ёрдам ажратиш, уй-жойнинг кадастр ҳужжатларини расмийлаштириш, эҳтиёжманд оилаларга моддий кўмак кўрсатиш, маҳалладаги маиший чиқиндиларни ўз вақтида олиб чиқиш, боғ ташкил этишда амалий ёрдам бериш, болалар нафақаси тайинлаш ҳамда оилавий масалалар билан боғлиқ мурожаатлар билдирилди.
Туман ҳокими ва депутат Нажмиддинов Асадулла Икромович ҳар бир мурожаатчини диққат билан тинглаб, кўтарилган масалаларни қонунчилик доирасида ҳал этиш юзасидан зарур тушунтириш ва тавсиялар берди.
Қабул жараёнида ижобий ҳал этиш имкони бўлган айрим масалалар бўйича тегишли чоралар белгиланди. Қўшимча ўрганиш талаб этиладиган мурожаатлар юзасидан эса масъул идора ва ташкилотлар раҳбарларига аниқ вазифалар юклатилди.
Барча мурожаатларни белгиланган муддатларда қонуний ва сифатли ҳал этиш, натижаси бўйича фуқароларга асослантирилган жавоб бериш вазифалари назоратга олинди.