#deputatlik_nazorati_Uchtepa
#deputat_so'rovi

🇺🇿 Xalq deputatlari Uchtepa tumani Kengashiga O'zLiDePdan saylangan "12-Nazarbek" saylov okrugi deputati Xudayberganov Avaz Abrarovich tomonidan Uchtepa tumani hokimining qurilish, to‘siqlarsiz muhit yaratish, kommunikasiyalarni rivojlantirish, ekologiya va ko‘kalamzorlashtirish masalalari bo‘yicha o‘rinbosari – tuman Obodonlashtirish boshqarmasi boshlig‘i N.Ismatovga navbatdagi deputatlik so'rovi chiqarildi.

🗂 O‘zbekiston Respublikasi Prezidentining 2023-yil 10-oktabrdagi PQ-330-son qarori, 2026-yil uchun Davlat byudjeti to‘g‘risidagi Qonun hamda Vazirlar Mahkamasining 2024-yil 11-oktabrdagi 665-son qarori ijrosini ta’minlash maqsadida Xalq deputatlari Uchtepa tumani Kengashining 2026-yil 1-apreldagi III-27-28-14-202-K/26-son qarori qabul qilingan bo‘lib, mazkur qaror bilan tumandagi ichki yo‘llarni saqlash va joriy ta’mirlash, asfalt qoplamasi yotqizish hamda hudud infratuzilmasini yaxshilash bo‘yicha manzilli chora-tadbirlar belgilanganligi qayd etilgan.

📊 Mazkur qaror ijrosining amaldagi holatini o‘rganish hamda doimiy komissiya tomonidan tahlil qilish maqsadida quyidagi ma’lumotlarni taqdim etilishi so'ralmoqda:

✍️ Xalq deputatlari Uchtepa tumani Kengashining 2026-yil 1-apreldagi III-27-28-14-202-K/26-son qarori ilovasida ko‘rsatilgan manzillar kesimida bugungi kunga qadar qaysi obyektlarda ishlar to‘liq yakunlanganligi haqida;

✍️ qaror ilovasida nazarda tutilgan manzillar bo‘yicha belgilangan ishlardan qancha qismi bajarilganligi hamda amalda asfalt qoplamasi yotqizilgan maydonlar haqida;

✍️ qaror ilovasida ko‘rsatilgan manzillardan qaysilarida ishlar davom etayotganligi hamda ularning bugungi kundagi bajarilish holati to‘g‘risida;

✍️ mazkur qarorning ilovasida nazarda tutilgan manzillardan qaysilarida ishlar hali boshlanmaganligi va buning sabablari haqida;

✍️ qolgan manzillarda ishlarni yakunlash bo‘yicha belgilangan muddatlar hamda mas’ul tashkilotlar to‘g‘risidagi ma’lumotlar.

🗣 Deputatlik so‘rovida ko‘tarilgan masala yuzasidan o‘rganish natijalari hamda amalga oshiriladigan ishlar bo‘yicha 10 kun muddatda asoslantirilgan ma’lumot taqdim etish talabi qo‘yilgan. Mazkur masala deputat tomonidan nazoratga olingan.