O‘rganish davomida mahalladagi ikki hududda — “Qozog‘iston” turar joy majmuasi va poliklinika oralig‘idagi yo‘l qismi, shuningdek 122A-uy yaqinidagi bolalar maydonchasi atrofidagi yo‘l qismida asfalt-beton ishlari sifatsiz bajarilgani yuzasidan aholining e’tirozlari tinglandi.

Fuqarolarning ta’kidlashicha, joriy yil 15-may kuni mazkur hududlarda ta’mirlash ishlari amalga oshirilgan bo‘lsa-da, qisqa vaqt ichida yo‘l qoplamasi cho‘kib, ayrim joylarda yemirilish va notekisliklar paydo bo‘lgan. Natijada chang ko‘tarilishi, bolalar va mahalla aholisi salomatligiga salbiy ta’sir ko‘rsatishi hamda harakat xavfsizligiga noqulaylik tug‘dirishi mumkin bo‘lgan holatlar yuzaga kelgan.

Aholi mazkur yo‘l qismlarida ta’mirlash ishlarini texnik talablarga rioya qilgan holda, sifatli va kunduzgi vaqtda qayta amalga oshirish zarurligini bildirmoqda.

Mazkur masala “Xalq deputatlari viloyat, tuman va shahar Kengashi deputatining maqomi to‘g‘risida”gi Qonun, “Jismoniy va yuridik shaxslarning murojaatlari to‘g‘risida”gi Qonun, “Avtomobil yo‘llari to‘g‘risida”gi Qonun, shuningdek “Mahalliy davlat hokimiyati to‘g‘risida”gi Qonunda belgilangan vazifalar mazmunidan kelib chiqib o‘rganildi.

Deputat O.R. Kashkarov tomonidan fuqarolar murojaatida ko‘tarilgan masalalar tegishli mas’ul tashkilotlarga yetkazilishi hamda muammoni qonuniy tartibda bartaraf etish bo‘yicha amaliy choralar ko‘rilishi ta’kidlandi.

✅ Maqsad — mahalla aholisi uchun xavfsiz, qulay va sifatli yo‘l infratuzilmasini ta’minlashga ko‘maklashishdir.

Bizni kuzatishda davom eting!