Xalq deputatlari Qo‘qon shahar Kengashi deputati Sh.Dexkanov tomonidan yoshlar bilan ishlash, ularni qo‘llab-quvvatlash hamda “Yoshlar daftari” jamg‘armasi mablag‘laridan foydalanish holati yuzasidan yuborilgan deputatlik so‘roviga Qo‘qon shahar Yoshlar ishlari bo‘limi tomonidan rasmiy javob taqdim etildi.

Taqdim etilgan ma’lumotlarga ko‘ra, 2026-yilning yanvar–may oylari davomida “Yoshlar daftari” jamg‘armasiga jami 2 milliard 232 million so‘mdan ortiq mablag‘ tushgan bo‘lib, bugungi kunda jamg‘armada 1 milliard 816 million so‘mdan ortiq qoldiq mablag‘ mavjud.

Mazkur davrda:
25 nafar yoshning ta’lim kontrakti uchun mablag‘ ajratilgan;
haydovchilik kurslarida o‘qish uchun subsidiyalar berilgan;
yoshlar festivallari, forumlar va ma’naviy-ma’rifiy tadbirlarni tashkil etish uchun mablag‘lar yo‘naltirilgan.

Shuningdek, “Yoshlar daftari”ga kiritilgan 67 nafar yoshning 42 nafariga amaliy yordam ko‘rsatilgan, “qizil” toifadagi ishsiz yoshlar bilan manzilli ishlash natijasida esa yuzlab yoshlarning bandligini ta’minlashga erishilgan.

Yoshlarning bo‘sh vaqtini mazmunli tashkil etish maqsadida shaharda “Besh tashabbus olimpiadasi”, sport musobaqalari, ko‘rik-tanlovlar, forumlar va madaniy-ma’rifiy tadbirlar muntazam ravishda o‘tkazilib, ularda minglab yoshlar qamrab olingani qayd etildi.

Bundan tashqari, yoshlarni zamonaviy kasblarga o‘qitish, IT va xorijiy tillar bo‘yicha bilimlarini oshirish maqsadida turli to‘garak va o‘quv kurslari tashkil etilgan bo‘lib, ularga yuzlab yoshlar jalb qilingan.

Deputat tomonidan ko‘tarilgan masala yuzasidan taqdim etilgan ma’lumotlar o‘rganilib, yoshlarni qo‘llab-quvvatlashga qaratilgan ishlar ijrosi yuzasidan deputatlik nazorati davom ettiriladi.

Xalq deputatlari Qo‘qon shahar Kengashi