Xalq deputatlari Muzrabot tumani Kengashiga 16-Sho‘rob saylov okrugidan saylangan deputat Svetlana Jumayeva tumandagi “Fidokor” mahallasida bo‘lib, hududda tadbirkorlik faoliyati bilan shug‘ullanayotgan fuqarolar bilan uchrashuv o‘tkazdi.

Jumladan, tikuvchilik sohasida faoliyat yuritayotgan tadbirkor Laylo Abrayevaning mehnat faoliyati o‘rganildi. U tomonidan tashkil etilgan kichik tikuvchilik sexida 5 ta zamonaviy tikuv mashinasi mavjud bo‘lib, bu yerda 6 nafar xotin-qiz doimiy ish bilan ta’minlangan. Bu esa mahallada aholi bandligini ta’minlash, xotin-qizlarning iqtisodiy faolligini oshirish va oilalar farovonligini yuksaltirishda muhim ahamiyat kasb etmoqda.

Shuningdek, uchrashuvlar davomida tadbirkorlarga O‘zbekiston Respublikasining 2012-yil 26-aprelda qabul qilingan “Oilaviy tadbirkorlik to‘g‘risida”gi O‘RQ–327-sonli Qonunining mazmun-mohiyati haqida tushunchalar berildi. Xususan, oilaviy tadbirkorlik subyektlarining huquq va qonuniy manfaatlari davlat tomonidan himoya qilinishi, ularning erkin faoliyat yuritishi uchun yaratilgan huquqiy kafolatlar xususida atroflicha ma’lumotlar taqdim etildi.

O‘rganishlar yakunida deputat tadbirkorlar bilan doimiy muloqotda bo‘lishini, ularning faoliyati davomida yuzaga keladigan muammolarni hal etishda amaliy ko‘mak ko‘rsatishga tayyor ekanligini ta’kidlab, fuqarolarning murojaatlariga doimo e’tibor qaratilishini bildirdi.