3-Nurafshon saylov okrugida deputatlar tomonidan hududdagi mavjud holat va amalga oshirilayotgan ishlar yuzasidan o‘rganish ishlari olib borildi.

Xalq deputatlari Termiz tuman Kengashi raisi S. Nazarov, deputat G. Shafoatova tomonidan 3-Nurafshon saylov okrugi deputati K. Abdullayeva hududida hududning infratuzilmasi bilan tanishib, joylarda amalga oshirilayotgan bunyodkorlik ishlari jarayonini ko‘zdan kechirdi.

O‘rganish davomida piyodalar yo‘lakchalari holati, tungi yoritish tizimining uzluksiz ishlashi hamda maktab binosida olib borilayotgan rekonstruksiya ishlari sifati alohida nazoratdan o‘tkazildi. Shuningdek, bajarilayotgan ishlarning belgilangan talab va me’yorlarga mosligi, xavfsizlik qoidalariga rioya etilishi hamda aholiga yaratilayotgan qulayliklar tahlil qilindi.

Mas’ullar bilan muloqot chog‘ida aniqlangan kamchiliklarni bartaraf etish va ishlar sifatini yanada oshirish yuzasidan tegishli tavsiyalar berildi.

Mazkur o‘rganishlar hududda infratuzilmani rivojlantirish, fuqarolar uchun yanada xavfsiz va qulay sharoitlar yaratishga xizmat qilishi ta’kidlandi.

Shuningdek hududga tashrif davomida fuqarolar bilan uchrashuv o‘tkazilib, ularning murojaatlari, muammo va takliflari o‘rganilib, tegishli tartibda qayd etib olindi.