Xalq deputatlari Ulug‘nor tumani Kengashi deputati G.Soliyeva o‘z saylov okrugida aholi salomatligini mustahkamlash, ayniqsa xotin-qizlar salomatligini muhofaza qilish borasida olib borilayotgan ishlar bilan yaqindan tanishish maqsadida hududdagi
qishloq vrachlik punktiga tashrif buyurdi. Tashrif davomida deputat tibbiyot muassasasi xodimlari bilan ochiq muloqot o‘tkazib, reproduktiv salomatlikni asrash, onalik va bolalikni muhofaza qilish, kasalliklarning oldini olish borasidagi targ‘ibot-tashviqot ishlarini yanada kuchaytirish zarurligini alohida ta’kidladi. Shuningdek, deputat tashabbusi bilan tibbiyot xodimlari ishtirokida hududdagi 14-sonli umumta’lim maktabining bitiruvchi sinf qizlari uchun ma’naviy-ma’rifiy va tibbiy profilaktik yo‘nalishdagi uchrashuv tashkil etildi. Mazkur uchrashuvda yosh qizlarga sog‘lom turmush tarzini shakllantirish, shaxsiy gigiyena qoidalariga rioya etish, erta nikohning salbiy oqibatlari hamda reproduktiv salomatlik masalalari yuzasidan batafsil tushuntirishlar berildi. 

Tadbir davomida mutaxassislar tomonidan berilgan tavsiyalar yoshlar tomonidan katta qiziqish bilan tinglanib, ularni qiziqtirgan savollarga batafsil javoblar qaytarildi. Bu kabi uchrashuvlar yosh avlodning sog‘lom va barkamol bo‘lib voyaga yetishida muhim ahamiyat kasb etishi qayd etildi. Deputat tomonidan bildirilgan fikr va takliflar asosida kelgusida ham tibbiyot muassasalari bilan hamkorlikda aholining, ayniqsa xotin-qizlar va yoshlarning salomatligini mustahkamlashga qaratilgan tizimli ishlarni davom ettirish belgilab olindi.