Поромон маҳалла фуқаролар йиғини ҳудудида аҳолини ичимлик суви билан таъминлашни яхшилаш мақсадида амалга оширилаётган ишлар юзасидан ўрганиш ишлари олиб борилди.

Маълумки, ушбу ҳудудда давлат дастури асосида аҳоли хонодонларига ичимлик суви тармоғини тортиш ҳамда сув ускуналарини ўрнатиш ишлари белгиланган. Мазкур ишлар аҳоли учун қулай шарт-шароитлар яратиш, турмуш фаровонлигини ошириш ҳамда инфратузилмани ривожлантиришга хизмат қилиши лозим.

Бироқ ўрганиш жараёнида белгиланган ишлар амалга оширилишида сусткашликка йўл қўйилаётгани, айрим ҳудудларда ишлар белгиланган муддатларда бажарилмаётгани аниқланди.

Натижада ушбу ҳолат маҳалла аҳолиси ўртасида асосли норозиликларга сабаб бўлмоқда ҳамда мурожаатлар сони ортишига олиб келмоқда.

Шундан келиб чиқиб, мазкур масала юзасидан тегишли ташкилотлар ва масъулларга дастур доирасида белгиланган ишлар ижросини жадаллаштириш, қурилиш-монтаж ишларини белгиланган муддатларда ва сифатли амалга ошириш, шунингдек, аҳолини ичимлик суви билан барқарор таъминлаш юзасидан зарур чора-тадбирларни кўриш бўйича топшириқлар берилди.

Халқ депутатлари Янгиқўрғон туман Кенгаши томонидан ушбу масала ижроси устидан доимий депутатлик назорати ўрнатилиб, амалга оширилаётган ишлар юзасидан мунтазам мониторинг олиб борилади.