Xalq deputatlari Guliston shahar Kengashi deputati Qobil To‘rayev tomonidan Guliston shahri “Yangi O‘zbekiston” bog‘i hududida barpo etilayotgan gandbol sport kompleksi qurilish jarayonlari joyiga chiqqan holda o‘rganildi.

O‘rganish davomida obyektning qurilish sur’atlari, amalga oshirilayotgan ishlarning sifati, loyiha hujjatlariga muvofiqligi hamda belgilangan muddatlarda topshirilishi masalalariga alohida e’tibor qaratildi.

Deputat tomonidan mazkur sport majmuasi nafaqat shaharda sport infratuzilmasini rivojlantirish, balki yoshlarning bo‘sh vaqtini mazmunli tashkil etish, ularni sog‘lom turmush tarziga keng jalb etishda muhim ahamiyat kasb etishi ta’kidlandi.

Shuningdek, qurilish ishlari sifatli va o‘z vaqtida yakunlanishi yuzasidan mas’ullarga tegishli tavsiya va ko‘rsatmalar berilib, obyektning foydalanishga topshirilishigacha deputatlik nazorati davom ettirilishi bildirildi.