Muzrabot tumanida 2025-yilgi “Tashabbusli budjet” jarayonining 2-mavsumida g‘olib deb topilgan tumanning "Fayziobod" mahallasidagi 27-son umumiy o‘rta ta’lim maktabida zamonaviy sport infratuzilmasi barpo etilib, foydalanishga topshirildi.

Xalq deputatlari Muzrabot tumani Kengashi kotibiyati mudiri- deputat D.Sherboyev hudud deputati A.Do‘sanov bilan tumandagi “Fayziobod” mahallasiga borib, jarayonlar bilan tanishdilar.

Mazkur loyiha doirasida maktab hududida mini stadion, workout maydonchasi (ochiq sport maydonchasi) hamda yuvinish xonalari qurilib, to‘liq foydalanishga topshirildi.

Ushbu loyihani amalga oshirish uchun jami 1 milliard 264 million so‘m mablag‘ yo‘naltirildi. Natijada, maktab o‘quvchilari, shuningdek, mahalla aholisi uchun sport bilan muntazam shug‘ullanish, sog‘lom turmush tarzini olib borish uchun zamonaviy va qulay sharoitlar yaratildi.

Yangi sport inshootlarining foydalanishga topshirilishi maktab jamoasi hamda mahalla aholisi tomonidan katta mamnuniyat bilan kutib olindi.