Xalq deputatlari Kattaqo‘rg‘on shahar Kengashi 3-Samad Raximov saylov okrugi deputati Xamrayev Ravshan Djabborovich tomonidan hududlarda O‘zbekiston Respublikasining “Tadbirkorlik faoliyati erkinligining kafolatlari to‘g‘risida”gi O‘RQ-328-sonli Qonuni ijrosi yuzasidan keng qamrovli o‘rganish ishlari olib borildi.

Mazkur o‘rganishlar doirasida deputat tomonidan hududda faoliyat yuritayotgan kichik biznes va xususiy tadbirkorlik subyektlariga bevosita tashrif buyurilib, ularning xizmat ko‘rsatish va savdo yo‘nalishidagi faoliyati bilan yaqindan tanishildi. Tadbirkorlar uchun yaratilgan shart-sharoitlar, jumladan, kredit resurslariga kirish imkoniyati, infratuzilma ta’minoti, yer ajratish, soliq va boshqa majburiy to‘lovlar bilan bog‘liq masalalar joyida o‘rganildi.

O‘rganish jarayonida tadbirkorlar bilan ochiq muloqotlar tashkil etilib, ularning kundalik faoliyatida uchrayotgan muammolar, mavjud to‘siqlar hamda takliflari tinglandi. Xususan, ayrim holatlarda hujjatlashtirish jarayonlarining murakkabligi, muhandislik-kommunikatsiya tarmoqlariga ulanishdagi kechikishlar, moliyaviy resurslardan foydalanishdagi qiyinchiliklar yuzasidan murojaatlar qayd etildi.

Shuningdek, qonun talablariga muvofiq tadbirkorlik subyektlarining huquq va qonuniy manfaatlarini himoya qilish, ularning faoliyatiga asossiz aralashuvlarning oldini olish, tekshiruvlarni tartibga solish kabi masalalarga ham alohida e’tibor qaratildi. Bu borada tegishli tashkilotlar faoliyati ham tahlil qilinib, qonun ijrosini ta’minlash holati baholandi.