Orol mahallasida infratuzilma loyihalari ijrosi va "yettilik" faoliyati o‘rganildi

Termiz tumanida Islom taraqqiyot banki ishtirokida amalga oshirilayotgan xalqaro loyiha doirasida bir qator mahallalarda infratuzilmani yaxshilashga qaratilgan ishlar izchil davom etmoqda. Jumladan, hozirgi kunda 5 ta mahallada 23 ta subloyiha amalga oshirilmoqda.

Tuman hokimi Shuxrat Qalandarov "Orol" mahallasida bo‘lib, ushbu loyihalar doirasida amalga oshirilayotgan ishlar, aholi uchun yaratilayotgan sharoitlar hamda infratuzilmani yaxshilash tadbirlari bilan yaqindan tanishdi.

Tadbirda Xalq deputatlari tuman Kengashi kotibiyati mudiri, deputatlar va tegishli tashkilotlar mas’ullari ishtirok etdi. Dastlab, ichimlik va oqova suvi ta’minotini yaxshilash bo‘yicha olib borilayotgan ishlar yuzasidan mas’ullarning axboroti tinglandi. Shuningdek, loyihalar ijrosi bo‘yicha mutasaddilar hisobot berdi.

Shu bilan birga, aholining tomorqadan samarali foydalanish holati hamda mahalla "yettiligi" faoliyati ham o‘rganildi. "Yettilik"ning aholi bilan ishlash samaradorligi tanqidiy ko‘rib chiqilib, faoliyatni yanada kuchaytirish bo‘yicha aniq vazifalar belgilab berildi.