DEPUTATNING AHOLI BILAN UCHRASHUVIDA KO‘TARILGAN MUAMMO YUZASIDAN DEPUTATLIK SO‘ROVI YUBORILDI.
Xalq deputatlari Parkent tuman Kengashi deputatlari tomonidan aholi murojaatlarini o‘rganish, fuqarolarni qiynayotgan masalalarni aniqlash va ularning ijobiy yechimini ta’minlashga ko‘maklashish borasidagi ishlar izchil davom ettirilmoqda.
📌 Saylovchilar bilan o‘tkazilgan uchrashuvlar hamda “Navro‘z” va “Qo‘shshukr” mahalla fuqarolar yig‘inlarida istiqomat qiluvchi aholi bilan muloqotlar davomida maishiy chiqindilarni o‘z vaqtida olib chiqish bilan bog‘liq dolzarb muammo ko‘tarildi.
📌 Fuqarolarning bildirishicha, so‘nggi ikki oy davomida mazkur mahallalarda maishiy chiqindilarni olib chiqishda uzilishlar kuzatilgan. Aholi belgilangan grafik asosida chiqindilarni ko‘chaga chiqarayotgan bo‘lsa-da, mas’ul tashkilot tomonidan ularning o‘z vaqtida olib chiqilmasligi natijasida ko‘chalarda chiqindilar to‘planib qolmoqda. Bu holat aholi uchun noqulayliklar tug‘dirib, hududning sanitariya-tozalik holatiga salbiy ta’sir ko‘rsatmoqda.
⚠️ Mazkur vaziyat chiqindilarni olib chiqish xizmatini belgilangan jadval asosida tashkil etish, mas’ul tashkilotlar faoliyatidagi mavjud kamchiliklarni aniqlash hamda hududlarda sanitariya talablariga rioya etilishini ta’minlash zarurligini ko‘rsatmoqda.
📌 Aholi tomonidan ko‘tarilgan muammo yuzasidan Parkent tuman hokimining o‘rinbosari Sh. Akramovga 2026-yil 23-oktabrdagi 62-ds-485-26-sonli deputatlik so‘rovi yuborildi.
📌 Deputatlik so‘rovida “Navro‘z” va “Qo‘shshukr” MFYlarda maishiy chiqindilarni belgilangan grafik asosida o‘z vaqtida olib chiqilmasligi sabablarini o‘rganish, mavjud muammolarni bartaraf etish hamda chiqindilarni muntazam olib chiqilishini ta’minlash yuzasidan tegishli choralar ko‘rish so‘raldi.
Shuningdek, amalga oshirilgan ishlar, mavjud muammolarni bartaraf etish bo‘yicha ko‘rilayotgan choralar va kelgusida bunday holatlarning takrorlanishiga yo‘l qo‘ymaslik yuzasidan belgilangan chora-tadbirlar to‘g‘risida asoslantirilgan yozma ma’lumot taqdim etish talabi qo‘yildi.
⚠️ Deputatlik nazorati — aholi murojaatlarini mas’ullar e’tiboriga yetkazish bilangina cheklanmay, ko‘tarilgan masalalarning amaliy yechimini izlash va ularning hal etilishi yuzasidan tegishli nazoratni olib borishni ham nazarda tutadi.
➡️ Aholi uchun qulay va sog‘lom yashash muhitini yaratish, mahallalarda sanitariya-tozalikni ta’minlash hamda maishiy chiqindilarni o‘z vaqtida olib chiqish masalalari deputatlik nazorati doirasida kuzatib boriladi.