Xalq deputatlari Qo‘qon shahar Kengashining navbatdagi sessiyasi kun tartibiga kiritilgan Shahar Tibbiyot birlashmasi boshlig‘ining 2026-yil 6 oyi mobaynidagi faoliyati to‘g‘risidagi hisoboti yuzasidan Kengashning Ijtimoiy soha, yoshlar siyosati, madaniyat va sport masalalari bo‘yicha doimiy komissiyasi a’zolari tomonidan Qo‘qon shahar Rejali statsionar shifoxonasida o‘rganish ishlari olib borildi.

O‘rganish davomida shifoxonada bemorlarga ko‘rsatilayotgan tibbiy xizmatlar sifati, davolash bo‘limlarining faoliyati, tibbiy jihozlar va dori-darmonlar bilan ta’minlanganlik darajasi, shuningdek, sanitariya-gigiyena talablariga rioya etilishi holati atroflicha tahlil qilindi.

Xususan, davlat tomonidan bepul ajratiladigan dori-darmon vositalarining mavjudligi, ularni saqlash va bemorlarga belgilangan tartibda yetkazib berish tizimi, shuningdek, statsionar sharoitida davolanayotgan fuqarolar uchun yaratilgan sharoitlar o‘rganildi.

Shuningdek, palatalarning holati, bemorlar uchun yaratilgan qulayliklar, ovqatlanish sifati, tibbiyot xodimlarining fuqarolar bilan ishlash madaniyati hamda shifoxonaning moddiy-texnik bazasini yanada mustahkamlash masalalari yuzasidan mas’ullar bilan fikr almashildi.

Mazkur o‘rganish natijalari Xalq deputatlari Qo‘qon shahar Kengashining navbatdagi sessiyasida Shahar Tibbiyot birlashmasi boshlig‘ining 2026-yil 6 oylik hisobotini ko‘rib chiqish jarayonida inobatga olinadi.

Xalq deputatlari Qo‘qon shahar Kengashi