Xalq deputatlari Parkent tumani Kengashiga 3-“Bog‘bon” saylov okrugidan saylangan deputat To‘layev Eldor Zafaritdin o‘g‘li hamda 7-“Xisorak” saylov okrugidan saylangan deputat Mannonov Abduzarif Abduraufovich, Kengash kotibiyati bosh mutaxassisi Mirzayev Dilshod Ruxutdin o‘g‘li va Parkent tuman hokimligi Qurilish bo‘limi bosh mutaxassisi F.Narimonov ishtirokida “Gulbog‘” mahalla fuqarolar yig‘inida amalga oshirilayotgan ko‘p qavatli uylar qurilishi loyihasi bilan tanishildi.O‘rganish davomida loyiha hududining bosh reja maketi ko‘zdan kechirilib, ko‘p qavatli uy-joylar, ichki yo‘llar,muhandislik-kommunikatsiya tarmoqlari, yashil hududlar hamda aholi uchun yaratiladigan ijtimoiy infratuzilma obyektlari yuzasidan mutaxassislarning ma’lumotlari tinglandi.Shuningdek, mazkur bunyodkorlik ishlari hududning zamonaviy qiyofasini shakllantirish, aholining uy-joy sharoitlarini yaxshilash hamda yangi qulayliklar yaratishga xizmat qilishi ta’kidlandi.Deputatlar tomonidan loyiha ijrosining borishi yuzasidan jamoatchilik nazoratini olib borish va aholi fikr-mulohazalarini inobatga olish muhimligi qayd etildi.Xalq deputatlari Parkent tumani Kengashi tomonidan hududlarda amalga oshirilayotgan bunyodkorlik va rivojlantirish loyihalarini muntazam o‘rganish hamda ularning ijrosi ustidan deputatlik nazoratini ta’minlash ishlari davom ettirilmoqda.