Uchrashuvda Xalq deputatlari Marg‘ilon shahar Kengashi kotibiyati mudiri A. Ermatov, kotibiyat bosh mutaxassisi Z. Yakubova, “Madad” nodavlat notijorat huquqiy maslahat byurosi Marg‘ilon shahar bosh mutaxassisi S. Ismoilov, Yoshlar maslahat guruhi a’zosi E.Nishonov, mahalla yettiligi vakillari, shahar kommunal xizmatlari mutasaddilari hamda Obodonlashtirish boshqarmasi boshlig‘i o‘rinbosari ishtirok etdi.

Uchrashuv davomida Kengash kotibiyati tomonidan tayyorlangan tahliliy ma’lumotlar asosida Marg‘ilon shahrini 2026-yilda ijtimoiy-iqtisodiy rivojlantirish dasturida belgilangan loyihalar ijrosi, hududlarda olib borilayotgan bunyodkorlik va obodonlashtirish ishlari, aholi murojaatlari asosida amalga oshirilgan chora-tadbirlar hamda saylov okrugida bajarilgan ishlar yuzasidan batafsil axborot taqdim etildi.

Shuningdek, Yo‘rmado‘z mahalla fuqarolar yig‘ini hududida amalga oshirilgan hamda kelgusida rejalashtirilgan ijtimoiy-iqtisodiy loyihalar, ichki yo‘llarni ta’mirlash, ichimlik suvi va elektr ta’minotini yaxshilash, muhandislik-kommunikatsiya infratuzilmasini rivojlantirish, hududlarni obodonlashtirish hamda aholi turmush farovonligini oshirishga qaratilgan loyihalarning amalga oshirilish bosqichlari va kutilayotgan natijalari alohida ta’kidlab o‘tildi.

Ochiq muloqot tarzida o‘tgan uchrashuvda fuqarolar tomonidan bildirilgan taklif, mulohaza va murojaatlar tinglanib, ularni ijobiy hal etish yuzasidan tegishli mutasaddilarga aniq vazifalar belgilandi. Shuningdek, murojaatlarning ijrosini nazoratga olish va ularning qonunchilik doirasida hal etilishini ta’minlash bo‘yicha zarur choralar ko‘rilishi qayd etildi.

Uchrashuv yakunida saylovchilar tomonidan hududdagi ayrim dolzarb masalalar yuzasidan murojaatlar bildirildi. Xususan, Yo‘rmado‘z MFY hududidagi ariqlarni tozalash, ularning oqimini yaxshilash hamda To‘ralar ko‘chasida ichimlik suvi ta’minoti bilan bog‘liq muammoni bartaraf etish yuzasidan murojaatlar kelib tushdi. Mazkur murojaatlar tegishli tartibda ro‘yxatga olinib, ularni hal etish yuzasidan mas’ul tashkilotlar bilan hamkorlikda amaliy choralar ko‘rilishi hamda ijrosi nazoratga olinishi ma’lum qilindi.

Mazkur uchrashuv aholini Kengash faoliyati bilan yaqindan tanishtirish, saylovchilar bilan ochiq muloqotni yo‘lga qo‘yish hamda hududlarni kompleks rivojlantirishga qaratilgan ishlarning samaradorligini yanada oshirishga xizmat qildi.