Xalq deputatlari Guliston shahar Kengashi deputati Y. Usmonova Bahor mahallasida fuqarolar murojaatlarini tinglab, mahalla yettiligi bilan muloqot o‘tkazdi.

Uchrashuv davomida bir qator muhim masalalar ko‘tarildi. Jumladan: Bahor mahallasida uylarning raqamlashtirilmagani va ko‘chalarga nomlar berilmagani sababli tez tibbiy yordam hamda boshqa soha vakillari uchun noqulayliklar yuzaga kelayotgani ta’kidlandi. Ibratli mahallasi xotin-qizlar faoli zimmasiga Bahor va Yuksalish mahallalari birgalikda yuklatilgani, bu esa murojaatlar keskin ko‘payishiga olib kelayotgani aniqlandi. Fuqarolar tomonidan Malaka oshirish pedagogik mahorat markazining eski yotoqxona binosini davlat bog‘chasiga aylantirish bo‘yicha taklif bildirilib, hududda davlat bog‘chasiga ehtiyoj yuqoriligi qayd etildi.

Bildirilgan murojaat va takliflar deputat tomonidan nazoratga olinib, tegishli tashkilotlar bilan birgalikda o‘rganilishi ma’lum qilindi.