Xalıq deputatları Qaraózek rayonlıq Keńesiniń gezektegi on besinshi sessiyası bolıp ótti. Sessiyaǵa rayonlıq Keńes deputatları, hákim orınbasarları, siyasiy partiyalar, rayonlıq mákeme, shólkemler, puqaralar jıyınları hám ǵalaba xabar qurallarınıń wákilleri qatnastı. Sessiya kún tártibinde dáslep rayondı sociallıq-ekonomikalıq rawajlandırıw baǵdarında 2025-jılı ámelge asırılǵan hám 2026-jılǵa belgilengen tiykarǵı wazıypalar hám rejeler haqqında rayon hákimi Baymuratov Anvar Maxsetovichtiń esabatı tıńlandı Bunnan soń Qaraózek rayonınıń 2026-jılǵı jergilikli byudjetin tastıyıqlaw haqqındaǵı hám Ózbekstan Respublikası Prezidentiniń 2024-jıl 20-dekabr kúngi PP-223-sanlı qararı tiykarında rayondı sociallıq-ekonomikalıq rawajlandırıw baǵdarlamasın tastıyıqlaw boyınsha rayon hákiminiń orınbasarı B.Ayapbergenovtıń usınısları dodalandı. Sonday-aq, altınshı basqısh "Hayallar dápteri" dizimine kirgizilgen hayal-qızlarǵa ámeliy járdemler kórsetilgen jumısları boyınsha rayon hákiminiń orınbasarı, shańaraq hám hayal-qızlar bólimi baslıǵı R.Sagidullaevanıń usınısı dodalandı. Sessiyada rayonlıq mektepke shekemgi hám mektep bilimlendiriwi bólimi, rayonlıq sanitariya epidemiologiyalıq hám jámiyet salamatlıǵı bólimleriniń 2025-jılda ámelge asırılǵan jumısları haqqındaǵı esabatları dodalandı.Sonday-aq, sessiyada Ózbekstan Respublikası Konstituciyasınıń 120-statyasına muwapıq Xalıq deputatları Qaraózek rayonlıq Keńesi deputatları arasınan siyasiy partiyalardan saylanǵan deputatlar wákilleriniń usınısına tiykarlanıp hám deputatlardıń qollap-quwatlawı menen rayonlıq Keńeske 15-Fazılov okruginen deputat Yusupova Gulistan Jamalatdinovna Xalıq deputatları Qaraózek rayonlıq Keńesi baslıǵı lawazımına saylandı