Xalq deputatlari Chinoz tumani Kengashi deputati Lazizjon O‘tkirov tomonidan Davlat kadastrlari palatasi Toshkent viloyati boshqarmasining Chinoz filialida O‘zbekiston Respublikasining amaldagi qonun hujjatlarining ijro etilishi holati o‘rganildi.

Mazkur o‘rganish jarayonida O‘zbekiston Respublikasining “Jismoniy va yuridik shaxslarning murojaatlari to‘g‘risida”gi O‘RQ-445-son Qonuni hamda “O‘zboshimchalik bilan egallab olingan yer uchastkalariga hamda ularda qurilgan binolar va inshootlarga bo‘lgan huquqlarni e’tirof etish to‘g‘risida”gi O‘RQ-937-son Qonuni ijrosi holati atroflicha tahlil qilindi.

Xususan, fuqarolar va yuridik shaxslardan kelib tushayotgan murojaatlarni qabul qilish, ularni belgilangan muddatlarda ko‘rib chiqish, murojaat mualliflariga qonuniy va asosli javoblar berish hamda murojaatlar ijrosini nazorat qilish masalalariga alohida e’tibor qaratildi. Shuningdek, murojaatlar bilan ishlashda qonun talablariga qat’iy rioya etilishi holati o‘rganildi.

Bundan tashqari, o‘zboshimchalik bilan egallab olingan yer uchastkalari hamda ularda qurilgan binolar va inshootlarga bo‘lgan huquqlarni e’tirof etish bo‘yicha amalga oshirilayotgan ishlar, hujjatlarni rasmiylashtirish jarayonlari, fuqarolarga ko‘rsatilayotgan amaliy yordam hamda ushbu qonun ijrosida uchrayotgan muammoli masalalar muhokama qilindi.

O‘rganish yakunlari bo‘yicha aniqlangan kamchiliklarni bartaraf etish, fuqarolarga xizmat ko‘rsatish sifatini yanada oshirish va qonunlar ijrosini ta’minlash yuzasidan tegishli taklif va tavsiyalar berildi.

Mazkur o‘rganish ishlari qonun ustuvorligini ta’minlash, davlat organlari faoliyatining ochiqligi va fuqarolar huquqlarini ishonchli himoya qilishga qaratilgan bo‘lib, bu kabi nazorat tadbirlari kelgusida ham izchil davom ettirilishi ta’kidlandi.