Prezidentimizning YUNЕSKO Bosh konferensiyasi 43-sessiyasidagi nutqida ta’lim sohasida sun’iy intellektni keng joriy etish masalasi ko‘tarilgani bugungi raqamli davr uchun juda dolzarb. “Sun’iy intellekt - maktab” loyihasi kelajak avlodning bilim olish jarayonini tubdan o‘zgartirishga qodir. Bu tashabbus orqali bolalar faqat bilim olibgina qolmay, balki mustaqil fikrlaydigan, tahlilchi, innovatsion dunyoqarashga ega shaxslar bo‘lib yetishadi.

Inklyuziv ta’lim bilan uyg‘unlashgan sun’iy intellekt texnologiyalari har bir bolaga teng imkoniyat yaratishga xizmat qiladi. Jismoniy yoki ijtimoiy to‘siqlardan qat’i nazar, har bir insonga zamonaviy ta’lim olish imkonini berish - YUNЕSKO tamoyillariga to‘liq mos. Bu yo‘nalishda O‘zbekistonning tashabbus ko‘rsatishi uning global miqyosdagi nufuzini yanada oshiradi, degan fikrdaman.

Shu bilan birga, ta’lim jarayonida sun’iy intellektning axloqiy qoidalari haqidagi masala ham muhim. Prezident tomonidan taklif etilgan “Sun’iy intellekt etikasi bo‘yicha xalqaro ekspertlar anjumani” g‘oyasi shu jihatdan o‘ta ahamiyatli. Bu nafaqat ilmiy-amaliy, balki insonparvarlik tamoyillariga asoslangan kelajak ta’limi uchun zarur poydevordir.

Akbar Yakubov, Xalq deputatlari Jizzax shahar Kengashi kotibiyati bosh mutaxassisi