Deputat va yoshlar uchrashuvi 

O‘zbekiston Respublikasi Xalq o‘qituvchisi, Xalq deputatlari viloyat Kengashi deputati Xamidjon Raximovning bitiruvchi maktab o‘quvchilari va yoshlar bilan mazmunli uchrashuvi bo‘lib o‘tdi. Oltiariq 2-sonli texnikumida tashkil etilgan mazkur tadbirda tuman Kengashi deputati O‘. Otaboyev, “Shuhrat” medali sohibi, tuman
Kengashi deputati Q. Axmedov, texnikum direktori E. Teshaboyev hamda 200 nafardan
ortiq yoshlar ishtirok etdi. Uchrashuv davomida Xamidjon Raximov yoshlar bilan samimiy muloqot qilib, ta’limning inson hayotidagi o‘rni, ilm olishga bo‘lgan intilish va doimiy o‘z ustida ishlashning
ahamiyati haqida atroflicha fikr bildirdi. Ayniqsa, bugungi globallashuv sharoitida raqobatbardosh kadr bo‘lish uchun zamonaviy bilim va ko‘nikmalarni egallash, chet tillarini o‘rganish, axborot texnologiyalaridan samarali foydalanish muhim ekani ta’kidlandi. Shuningdek, tarbiya masalasiga alohida urg‘u qaratilib, yoshlarni vatanparvarlik ruhida tarbiyalash, milliy qadriyatlarimizga hurmat, kattalarga ehtirom va jamiyat
oldidagi mas’uliyatni his etish kabi fazilatlar har bir yoshning hayotida muhim o‘rin tutishi qayd etildi. Nutq davomida ustoz insonning nafaqat bilim beruvchi, balki ma’naviy tarbiyachi sifatidagi o‘rni ham alohida e’tirof
etildi. Tadbirda so‘zga chiqqan boshqa ishtirokchilar ham yoshlarga o‘z tavsiya va maslahatlarini bildirib, ularni
aniq maqsad qo‘yish, kasb tanlashda ongli yondashish va yurtimiz taraqqiyotiga munosib hissa qo‘shishga chorlashdi. Uchrashuv yakunida yoshlar o‘zlarini qiziqtirgan savollarga javob olib, bunday muloqotlar
ular uchun katta motivatsiya manbai bo‘layotganini ta’kidladilar. Mazkur tadbir yoshlarning ma’naviy-axloqiy tarbiyasini mustahkamlash, ularni bilimli va faol shaxs sifatida shakllantirishda muhim ahamiyat kasb etdi.