ХАВФСИЗ ЙЎЛАК

Ғайрат маҳалласида пиёдалар ҳаракати хавфсизлиги таъминланмоқда

Уйчи туман автомобиль йўллари бошқармаси томонидан аҳоли учун қулай ва хавфсиз ҳаракатланиш шароитларини яратиш, йўл-транспорт ҳодисаларининг олдини олиш ҳамда пиёдалар хавфсизлигини таъминлаш мақсадида амалий ишлар олиб борилмоқда.

Жумладан, «Хавфсиз йўлак» лойиҳаси доирасида Ғайрат маҳалласи ҳудудидан ўтувчи Д-109 автомобиль йўлининг 22–23-км оралиғида пиёдалар учун махсус йўлакча барпо этилмоқда.

Мазкур ишлар Халқ депутатлари Уйчи туман Кенгаши котибият мудири, 8-Муборак сайлов округи депутати Н. Дедаханова томонидан ўрганилди. Ўрганиш жараёнида пиёдалар йўлакчасини барпо этиш ишларининг бориши, қурилиш сифати ҳамда аҳоли учун яратилаётган қулайликларга алоҳида эътибор қаратилди.

Қурилаётган пиёдалар йўлакчасининг умумий узунлиги 350 метр, эни эса 2 метрни ташкил этади. Мазкур йўлак маҳалла аҳолиси, йўлдан фойдаланувчи пиёдалар, шунингдек, таълим муассасалари, ижтимоий объектлар ва бошқа манзилларга қатновчи фуқаролар учун янада қулай ва хавфсиз ҳаракатланиш имкониятини яратади.

Айниқса, автомобиль йўли бўйлаб пиёдалар ҳаракати жадал бўлган ҳудудларда алоҳида йўлакларнинг ташкил этилиши йўл ҳаракати иштирокчилари хавфсизлигини таъминлашда муҳим аҳамият касб этади. Пиёдалар учун белгиланган махсус йўлак ҳайдовчилар ва
пиёдалар ҳаракатини тартибга солиш, улар ўртасидаги хавфли вазиятларни камайтиришга хизмат қилади.

Айни пайтда масъул ходимлар томонидан белгиланган ҳудудда қурилиш ва ободонлаштириш ишлари изчил давом эттирилмоқда. Барпо этилаётган йўлакнинг сифатли бажарилиши, белгиланган меъёрларга риоя қилиниши ҳамда аҳоли учун қулай шароит яратилишига алоҳида эътибор қаратилмоқда.

Депутат томонидан мазкур ишлар жараёнининг бориши ва сифати юзасидан назорат ишлари давом эттирилади