Xalq deputatlari Termiz shahar Kengashi kotibiyati mudiri, deputat A.Ashurov hamda Kengash kotibiyati bosh mutaxassisi A.Temirov Kengashning 3-“Shifokor” saylov okrugi deputati O.Lapasovaning saylov okrugiga qarashli “Shifokor” mahallasida bo‘lib, navbatdagi nazorat-tahlil tadbiri o‘tkazildi.

Mazkur jarayon Oliy Majlis Senati tomonidan mahalliy Kengash deputatlari faoliyati uchun belgilangan “24 ta eng muhim yo‘nalish” mezonlari asosida tashkil etildi.

Nazorat-tahlil davomida mahalla hududida joylashgan futbol maydonchasining bugungi holati ko‘zdan kechirildi.

Jumladan, sport inshootining umumiy holati, undan yoshlar va aholi tomonidan foydalanish imkoniyatlari, maydonchaning obodonligi hamda mavjud kamchiliklar o‘rganildi.

Shuningdek, hududdagi yoshlarning bo‘sh vaqtini mazmunli tashkil etish, ularni sportga keng jalb qilish, sog‘lom turmush tarzini targ‘ib etish va mahallalarda sport infratuzilmasidan samarali foydalanish masalalariga alohida e’tibor qaratildi.

O‘rganish jarayonida aniqlangan masalalar deputatlar tomonidan tahlil qilinib, futbol maydonchasidan yoshlar uchun yanada qulay va samarali foydalanish imkoniyatlarini kengaytirish, mavjud kamchiliklarni bartaraf etish hamda hududda sport bilan shug‘ullanish uchun yaratilgan shart-sharoitlarni yanada yaxshilash yuzasidan tegishli chora-tadbirlar belgilanib olindi.

Deputatlik nazorat-tahlil tadbirlarining bunday shaklda tashkil etilishi mahallalarda mavjud muammolarni bevosita joyiga chiqib aniqlash, ularni mas’ullar bilan muhokama qilish hamda aholi, ayniqsa yoshlar uchun yaratilgan shart-sharoitlarning samaradorligini oshirishga xizmat qiladi.