Namanganda 1-sonli kasb-hunar maktabida dual ta’lim tizimi samarasi o‘rganildi

Namangan shahar “Ozod” mahallasida joylashgan 1-sonli kasb-hunar maktabida dual ta’lim bo‘yicha olib borilayotgan ishlar hamda texnikum faoliyati bilan Namangan shahar hokimi, shahar Kengashi deputati Ayubxon Kamolov yaqindan tanishdi.

Bugungi kunda ta’lim tizimini zamon talablari asosida takomillashtirish, yoshlarning mehnat bozorida raqobatbardoshligini oshirish dolzarb vazifalardan biri hisoblanadi. Shu nuqtai nazardan dual ta’lim tizimi muhim ahamiyat kasb etmoqda.

Dual ta’lim — bu nazariy bilim va amaliy tajribani bir vaqtning o‘zida olish imkonini beruvchi tizimdir. Ya’ni o‘quvchi ta’lim muassasasida o‘qish bilan birga korxonada ishlab, o‘z kasbi bo‘yicha amaliy ko‘nikmalarni ham egallaydi.

Mamlakatimizda ham so‘nggi yillarda dual ta’limni rivojlantirishga alohida e’tibor qaratilmoqda. Ayrim kollej va texnikumlarda talabalar haftaning muayyan kunlarida o‘qish bilan birga korxonalarda amaliyot o‘tash orqali o‘z kasbiy ko‘nikmalarini mustahkamlamoqda.

Hozirgi kunda texnikumda 9 ta yo‘nalish bo‘yicha 1608 nafar o‘quvchi ta’lim olmoqda. Dual ta’lim yo‘nalishlari esa 7 ta bo‘lib, unda 749 nafar o‘quvchi tahsil olib, kasb-hunar egallamoqda.

Joriy yilda 350 nafar bitiruvchi yoshlar o‘zlari tanlagan yo‘nalishlar bo‘yicha mutaxassis bo‘lib chiqadi. Ushbu yoshlar bilan suhbatlashgan shahar hokimi ularning bandligini ta’minlash masalalariga jiddiy e’tibor qaratilishi yuzasidan tegishli mas’ullarga topshiriq va ko‘rsatmalar berdi.

Shuningdek, shahar Kengashi deputatlari tomonidan ham dual ta’lim tizimini yanada rivojlantirish, ish beruvchi korxonalar bilan hamkorlikni kuchaytirish hamda bitiruvchilarni ish bilan ta’minlash masalalari doimiy nazoratga olinishi ta’kidlandi.