Xalq deputatlari Bo‘zatov tumani Kengashi kotibiyati rahbari A.Ibragimov hamda 12-sonli "Aspantay" saylov okrugidan saylangan deputat G.Jumanazarova tomonidan 11-sonli umumiy o‘rta ta’lim maktabida ta’lim-tarbiya jarayonining amaldagi holatini o‘rganish maqsadida o‘rganish ishlari olib borildi.
Mazkur o‘rganish ishlari 2020-yil 23-sentyabrdagi O‘RQ-637-sonli "Ta’lim to‘g‘risida"gi Qonun talablari asosida tashkil etilib, ta’lim oluvchilar uchun sifatli ta’lim va tarbiya olish uchun yaratilgan shart-sharoitlar, ta’lim muassasasining moddiy-texnik bazasi, o‘quv jarayonining tashkil etilishi hamda mavjud infratuzilmaning holatiga alohida e’tibor qaratildi.
Jumladan, maktabda o‘quvchilarning ta’lim olishi uchun yaratilgan sharoitlar, o‘quv xonalarining holati, sanitariya-gigiyena talablari, xavfsizlik choralarining ta’minlanganligi, o‘quvchilarning bo‘sh vaqtini mazmunli tashkil etish imkoniyatlari hamda ta’lim muassasasining mavjud moddiy-texnik imkoniyatlari ko‘zdan kechirildi.
Shuningdek, ta’lim-tarbiya jarayonining samaradorligini ta’minlash, o‘quvchilarning bilim va ko‘nikmalarini rivojlantirish, ularning qobiliyatlarini namoyon etishlari uchun zarur sharoitlarni yanada yaxshilash masalalari yuzasidan maktab rahbariyati bilan fikr almashildi.
O‘rganish davomida ta’lim muassasasida mavjud muammolar, ularni bartaraf etish bo‘yicha amalga oshirilayotgan ishlar hamda kelgusida hal etilishi lozim bo‘lgan masalalar tahlil qilindi.
"Ta’lim to‘g‘risida"gi Qonunning 27-moddasida mahalliy davlat hokimiyati organlari tomonidan ta’lim oluvchilar uchun sifatli ta’lim va tarbiyani ta’minlash, ularning iste’dodini shakllantirish va namoyon etishi uchun joylarda zarur shart-sharoitlar yaratish bo‘yicha dasturlar ishlab chiqilishi belgilangan.
Shu nuqtai nazardan, o‘rganish natijalari asosida aniqlangan masalalarni tegishli tartibda hal etish, mavjud kamchiliklarni bartaraf etish va ta’lim oluvchilar uchun yanada qulay sharoitlarni yaratish bo‘yicha tegishli taklif va tavsiyalar ishlab chiqildi.