#Múnásibet

Ózbekstan Respublikası Prezidenti Shavkat Mirziyoevtiń Qaraqalpaqstan Respublikasına saparı sheńberinde Nókis qalası hám ulıwma aymaqtı sociallıq-ekonomikalıq rawajlandırıwǵa qaratılǵan iri joybarlarǵa start berilgeni áhmiyetli waqıya boldı. 592 million dollarlıq 11 joybar iske qosılıp, jáne 7 milliard dollarlıq 47 jańa joybardı ámelge asırıw baslandı. Bul joybarlar nátiyjesinde 8 mıń joqarı dáramatlı jumıs ornı jaratılıwı rejelestirilgen.

Nókis qalasında zamanagóy medicina mákemeleriniń iske qosılıwı da xalıqtıń salamatlıǵın qorǵaw kózqarasınan áhmiyetli. Sonıń ishinde, Birlesken Arab Ámirlikleri menen birgelikte qurılǵan 100 orınlıq Shayx Xalifa atındaǵı emlewxana zamanagóy medicinalıq úskeneler menen támiyinlengen. Sonday-aq, Qaraqalpaqstan ilimiy-ámeliy medicina akademiyasınıń shólkemlestiriliwi medicinalıq xızmet sapasın arttırıw hám qánigelerdiń mamanlıǵın joqarılatıwǵa xızmet etedi.

Nókis qalasında jámiyetlik transporttı jaqsılaw boyınsha ámelge asırılıp atırǵan jumıslar da xalıq ushın úlken áhmiyetke iye. Jańa avtobus hám elektrobuslardıń alıp keliniwi, keleshekte jáne qosımsha elektrobuslardıń satıp alınıwı qala xalqı hám miymanları ushın zamanagóy, qolaylı jáne ekologiyalıq taza transport sistemasın qáliplestiriwge xızmet etedi.

Sapar sheńberinde qalada sport infrastrukturasın rawajlandırıwǵa da ayrıqsha itibar qaratıldı. Jańalanǵan "Turan" stadionında futbol menen bir qatarda jeńil atletika, boks hám taekvondo menen shuǵıllanıw ushın zamanagóy sharayatlar jaratılǵan. Bul, ásirese, jaslardı sportqa keńnen tartıw, olardıń bos waqtın mazmunlı shólkemlestiriw hám qábiletli sporchılardı qollap-quwatlaw ushın áhmiyetli imkaniyat bolıp esaplanadı.

Qalanıń kelbetin abadanlastırıw, xalıq ushın zamanagóy dem alıw orınların shólkemlestiriw hám isbilermenlik ushın qolaylı ortalıq jaratıw baǵdarındaǵı jumıslar da itibarǵa ılayıq. Nókis qalasında bir qatar kóshelerdiń 2,5 kilometrlik bólegi ońlanıp, infrastrukturası jańalanǵanı xalıq ushın jáne de qolaylı ortalıq jaratıwǵa xızmet etpekte.

Ulıwma alǵanda, Prezidentimizdiń Qaraqalpaqstanǵa saparı hám xalıq penen ushırasıwı aymaqtı rawajlandırıwǵa kompleksli qatnas jasalıp atırǵanın kórsetti. Bul processte tek ǵana iri investiciyalıq joybarlar emes, al ápiwayı shańaraqlardıń dáramatın arttırıw, jańa jumıs orınların jaratıw, máhálle infrastrukturasın jaqsılaw, bilimlendiriw, medicina, sport hám transport tarawların rawajlandırıw sıyaqlı máselelerge de birdey itibar qaratılmaqta.

Jeke múnásibetim sıpatında sonı atap ótpekshimen, mámleketimiz basshısınıń Nókis qalasına saparı mende aymaǵımızdıń keleshegine salıstırǵanda jáne de úlken isenim oyattı. Ásirese, xalıq penen ashıqtan-ashıq sóylesiw, mashqalalardıń ornında úyreniliwi hám olardı sheshiw boyınsha anıq wazıypalar belgilep beriliwi mende unamlı tásir qaldırdı.

Qaraqalpaqstan - Ózbekstannıń áhmietli aymaqlarınan biri. Búgin bul jerde ámelge asırılıp atırǵan keń kólemli reformalar, jańa investiciyalıq joybarlar, zamanagóy sociallıq obektler hám jumıs orınlarınıń shólkemlestiriliwi aymaqtıń ekonomikalıq potencialın bunnan bılay da arttırıwǵa xızmet etedi.

Eń áhmiyetlisi, bul ózgerislerdiń orayında insan hám onıń mápleri tur. Xalıq ushın múnásip turmıs sharayatların jaratıw, shańaraqlardıń dáramatın arttırıw, jaslarǵa bilim alıw hám miynet etiw ushın jańa imkaniyatlar beriw - turaqlı rawajlanıwdıń áhmiyetli tiykarı bolıp esaplanadı.

Raxat Purxanov,
Xalıq deputatları Nókis rayonlıq
Keńesi deputatı

👉https://t.me/Nukus_tuman_Kengashi

🌐 Instagram 📹 Youtube ✅ Facebook