Xalq deputatlari Chilonzor tumani Kengashi deputati, Xalq demokratik partiyasi a’zosi Mahmudova Donoxon Artikovna tomonidan 7-sonli davlat maktabgacha ta’lim tashkilotida o‘rganish ishlari olib borildi.

O‘rganish davomida maktabgacha ta’lim tashkilotida tarbiyalanuvchilar uchun yaratilgan shart-sharoitlar, ta’lim-tarbiya jarayonining tashkil etilishi hamda bolalar xavfsizligini ta’minlash masalalariga alohida e’tibor qaratildi.

Jumladan, muassasaning moddiy-texnik bazasi, bino va inshootlarning texnik holati, tarbiyalanuvchilarni sifatli va xavfsiz oziq-ovqat bilan ta’minlash, ichimlik suvi sifati hamda ovqatlantirish jarayonining sanitariya-gigiyena talablariga muvofiqligi o‘rganildi.

O‘rganish davomida 7-sonli davlat maktabgacha ta’lim tashkilotining tashqi hududi va unga tutash yo‘l infratuzilmasi ham ko‘zdan kechirildi. Jumladan, muassasa hududida bolalar o‘yingohi mavjud emasligi, hovli hududini asfaltlashtirish zarurligi, shuningdek, tashkilot darvozasi oldida bolalar xavfsizligini ta’minlashga xizmat qiluvchi “Diqqat, bolalar!”, tegishli yo‘l belgilarining hamda piyodalar o‘tish joyi (yo‘l chizig‘i) mavjud emasligi aniqlandi.

Mazkur holatlar yuzasidan bolalar xavfsizligini ta’minlash, muassasa oldidagi yo‘l harakati xavfsizligini yaxshilash, piyodalar o‘tish joyini tashkil etish, tegishli ogohlantiruvchi yo‘l belgilarini o‘rnatish, bolalar o‘yingohini barpo etish hamda hovli hududini asfaltlashtirish bo‘yicha mas’ullarga tegishli tavsiya va takliflar bildirildi.

Bolalar salomatligi, xavfsizligi va farovonligini ta’minlash — doimiy e’tibor va mas’uliyatni talab etuvchi muhim vazifadir.