Xalq deputatlari Yangiobod tuman Kengashining Mahalliy budjet, tadbirkorlikni rivojlantirish va iqtisodiy islohotlar masalalari bo‘yicha doimiy komissiyasi raisi H.Qudratov tomonidan Xalq deputatlari Yangiobod tuman Kengashining VII-18-33-3-54-K/26-son qarori ijrosi asosida amalga oshirilgan ishlar holati o'rganildi.

Unga ko‘ra, Yangiobod tumanidagi I guruh nogironligi mavjud bo‘lgan 7 ta ehtiyojmand oilalarni qo‘llab-quvvatlash maqsadida tegishli chora-tadbirlar belgilangan.

Mazkur xonadonlarning devor va tom qismlarini izolyatsiya qilish, energiya tejamkor deraza va eshiklarni o‘rnatish, shuningdek, quyosh panellari yoki geliokollektorlar bilan jihozlash ishlari uchun tuman hokimligi huzuridagi “Infratuzilma va ijtimoiy barqarorlik” jamg‘armasi mablag‘lari hisobidan 433 million so‘m mablag‘ ajratilgan.

O‘rganish jarayonida ajratilgan mablag‘larning maqsadli yo‘naltirilishi, xonadonlarda yaratilayotgan sharoit, bajarilayotgan qurilish-ta’mirlash ishlari hamda energiya samaradorligini oshirish bo‘yicha ko‘rilayotgan choralar holati bevosita joyiga chiqib ko‘zdan kechirildi.

Fuqarolar bilan suhbat davomida ko‘rsatilayotgan amaliy yordam, xonadon sharoitini yaxshilash hamda energiya tejamkor texnologiyalardan foydalanishning afzalliklari yuzasidan fikr almashildi.

Energiya tejamkor deraza va eshiklar, devor va tom qismlarini izolyatsiya qilish, quyosh panellari yoki geliokollektorlarni o‘rnatish orqali xonadonlarda issiqlikni saqlash va energiyadan samarali foydalanish imkoniyatlarini oshirish ko‘zda tutilgan.

Mazkur ishlarning asosiy maqsadi — ehtiyojmand oilalarning yashash sharoitlarini yaxshilash, ularni ijtimoiy qo‘llab-quvvatlash, energiya xarajatlarini kamaytirishga ko‘maklashish hamda xonadonlarda qulay va zamonaviy sharoit yaratishdan iborat.