Sessiya kun tartibiga koʻra, Xalq deputatlari Toshkent viloyati Kengashining doimiy komissiyalar tarkiblari tasdiqlandi. Ish yuritish yoʻriqnomasi, kotibiyati toʻgʻrisidagi nizom ham oʻz tasdigʻini topdi. 

Shuningdek, viloyat hokimi oʻrinbosari – oila va xotin-qizlar boshqarmasi boshligʻi lavozimiga nomzod N. Normirzayevaning 2025-yilda xotin-qizlarning jamiyatdagi faolligini oshirish va oila institutini mustahkamlash, ijtimoiy himoyaga muhtoj xotin-qizlarni moddiy qoʻllab-quvatlash hamda ishsiz ayollarni bandligini taʼminlash boʻyicha amalga oshiriladigan maqsadli chora-tadbirlar dasturi taqdim qilindi. 

Unda tomorqachilik boʻyicha 1000 ta ilgʻor xonadonga daromadi kam boʻlgan 3 200 ta xonadonlarni biriktirish orqali ularning daromadini oshirish, migratsiyada boʻlgan kam daromadli xotin-qizlarni Vatanga qaytarish va daromadli ishga jalb qilish, biznesni kengaytirish istagidagi 1 296 nafar xotin-qizlarning tadbirkorlik loyihalarini qoʻllab-quvvatlash va bu orqali yangi ish oʻrni yaratish, shuningdek, birgina ipakchilik sohasida 90 mingdan ortiq xotin-qizlarning bandligini taʼminlash reja qilingan. 

Sessiya yakunida taqdimotda belgilangan chora-tadbirlarni saylangan okruglarida bajarilishida amaliy yordam koʻrsatish tavsiya etildi.