Xalq deputatlari Bo‘zatov tumani Kengashining 12-sonli “Aspantay” saylov okrugidan saylangan deputati G.Jumanazarova tomonidan 11-sonli umumiy o‘rta ta’lim maktabida saylovchilar bilan uchrashuv o‘tkazildi. Uchrashuvda Xalq deputatlari Bo‘zatov tumani Kengashi kotibiyati rahbari A.Ibragimov hamda deputat Sh.Berdaxov ishtirok etdi.

Uchrashuv davomida fuqarolarning murojaatlari, taklif va mulohazalari tinglanib, hududda ijtimoiy himoyaga muhtoj, kam ta’minlangan va daromadi yetarli bo‘lmagan oilalarni kambag‘allik holatidan chiqarish, ularning bandligini ta’minlash hamda barqaror daromad manbalarini shakllantirish masalalariga alohida e’tibor qaratildi.

Muloqotda kambag‘allikni qisqartirishni faqat moddiy ko‘mak bilan cheklab qolmasdan, oilalarning mehnat salohiyatidan samarali foydalanish, kasb-hunarga o‘qitish, doimiy va barqaror bandligini ta’minlash, tadbirkorlik faoliyatini yo‘lga qo‘yish hamda daromadlarini oshirish orqali ularning ijtimoiy-iqtisodiy holatini yaxshilash zarurligi ta’kidlandi.

Shuningdek, yil yakuniga qadar ehtiyojmand oilalarni kambag‘allik holatidan chiqarish va hududni kambag‘allikdan xoli hududga aylantirish bo‘yicha amalga oshirilishi lozim bo‘lgan chora-tadbirlar yuzasidan fikr almashildi. Mazkur yo‘nalishda har bir oilaning muammosini individual o‘rganish, mavjud imkoniyat va salohiyatidan kelib chiqib manzilli yondashuv asosida amaliy yordam ko‘rsatish muhimligi qayd etildi.

Uchrashuv yakunida bildirilgan taklif va murojaatlarni tegishli tashkilotlar bilan hamkorlikda o‘rganish, ularning qonuniy yechimini ta’minlash hamda belgilangan vazifalar ijrosini nazoratga olish bo‘yicha kelishib olindi.