Xalq deputatlari Muzrabot tumani Kengashi kotibiyati mudiri Dilmurod Sherboyev, 10-“Yangiyer” saylov okrugidan saylangan deputat Tangirov Tursunqul, shuningdek, kotibiyat bosh mutaxassislari Sh. Shoymardanov va B. Xoliqov ishtirokida “Yangi diyor” mahallasida barpo etilayotgan ko‘p qavatli uy-joylar qurilishida o‘rganish ishlari olib borildi.

O‘rganish davomida hududda amalga oshirilayotgan qurilish-ta’mirlash ishlari, belgilangan loyiha ko‘rsatkichlari hamda qurilish jarayonining borishi bilan yaqindan tanishildi.
Mazkur loyiha “ME’MOR INTER STORY” MChJ tomonidan amalga oshirilmoqda. Loyiha uchun jami 7,0 gektar yer maydoni ajratilgan bo‘lib, 2026–2027-yillar davomida hududda 28 ta 5 qavatli ko‘p xonadonli turar joy binosi barpo etilishi rejalashtirilgan. Har bir binoda 20 ta xonadon joylashadi.

Bugungi kunga qadar 10 ta 5 qavatli turar joy binosi qurib bitkazilgan. Hozirda mazkur binolarda ichki va tashqi pardozlash hamda fasad ishlari davom ettirilmoqda.

Deputatlar tomonidan qurilish jarayonining belgilangan loyiha va sifat talablariga muvofiqligi, ishlarning o‘z vaqtida bajarilishi hamda kelgusida aholi uchun qulay va zamonaviy yashash sharoitlarini yaratishga qaratilgan ishlar holatiga alohida e’tibor qaratildi.

Bunday o‘rganishlar hududlarda olib borilayotgan bunyodkorlik ishlarini deputatlik nazorati ostida kuzatib borish, mavjud masalalarni aniqlash va ularning o‘z vaqtida hal etilishiga ko‘maklashish nuqtayi nazaridan muhim ahamiyat kasb etadi.