Xalq deputatlari Boyovut tumani Kengashining navbatdagi 28-sessiyasi kun tartibiga kiritilgan masala yuzasidan tuman Kengashi deputatlari A.Ibadullayev, K.Karimova, O.Jumanazarov, X.Shayimova hamda kotibiyat bosh mutaxassisi Sh.Suvankulovlar tomonidan O‘zbekiston Respublikasining "Mahalliy davlat hokimiyati to‘g‘risida"gi Qonunining 19¹-moddasi talablariga muvofiq Boyovut tumani "Inson" ijtimoiy xizmatlar markazi faoliyati o‘rganildi.

Xususan, "Ijtimoiy himoya tizimida amalga oshirilgan ishlar hamda O‘zbekiston Respublikasi Prezidentining 2025-yil 21-apreldagi PF–71-son Farmoni ijrosi to‘g‘risida"gi masalani atroflicha ko‘rib chiqish maqsadida Ijtimoiy himoya milliy agentligining Boyovut tumani "Inson" ijtimoiy xizmatlar markazi faoliyati joyiga chiqib o‘rganildi.

O‘rganish davomida markaz tomonidan aholining ehtiyojmand qatlamlarini ijtimoiy qo‘llab-quvvatlash, ijtimoiy xizmatlarni ko‘rsatish, fuqarolar murojaatlari bilan ishlash hamda PF–71-son Farmonida belgilangan vazifalar ijrosini ta’minlash borasida amalga oshirilayotgan ishlar yuzasidan mas’ullar axboroti tinglandi.

Shuningdek, markaz faoliyatining samaradorligi, ko‘rsatilayotgan ijtimoiy xizmatlar sifati, mavjud muammolar va ularni bartaraf etish bo‘yicha ko‘rilayotgan choralar yuzasidan fikr almashildi.

O‘rganish natijalari asosida aniqlangan holatlar, mavjud muammo va kamchiliklar hamda ularni bartaraf etishga qaratilgan takliflar umumlashtirilib, Xalq deputatlari Boyovut tumani Kengashining Korrupsiyaga qarshi kurashish va xavfsizlik masalalari bo‘yicha doimiy komissiyasi yig‘ilishida muhokama etish uchun kiritilishi belgilandi.