Xalq deputatlari Termiz shahar Kengashi tomonidan hududdagi tashkilot va korxonalar faoliyatini o‘rganish, qonun hujjatlari ijrosini ta’minlash hamda aholi murojaatlariga amaliy yechim topish borasidagi deputatlik nazorati tadbirlari izchil davom ettirilmoqda.

Shu doirada Kengash kotibiyati mudiri, deputat A.Ashurov, 7-“Bog‘ishamol” saylov okrugi deputati, ekspert guruhi a’zosi Sh.Allamurodova hamda Kengash kotibiyati bosh mutaxassisi R.Mamashukurov tomonidan Termiz shahar Elektr ta’minoti korxonasi faoliyati yuzasidan nazorat-tahlil tadbiri o‘tkazildi.

Nazorat jarayonida korxona boshlig‘i o‘rinbosari Y.Tursunov tomonidan O‘zbekiston Respublikasining 2024-yil 7-avgustdagi “Energiyani tejash, undan oqilona foydalanish va energiya samaradorligini oshirish to‘g‘risida”gi O‘RQ–940-son Qonuni ijrosi yuzasidan amalga oshirilayotgan ishlar haqida ma’lumot berildi.

O‘rganish Oliy Majlis Senati tomonidan belgilangan “Mahalliy Kengash deputati faoliyatining eng muhim 24 ta yo‘nalishi” mezonlari asosida, xususan, 24-band — navbatdagi sessiyaga kiritiladigan masalalarni joyiga chiqib o‘rganish talabi doirasida tashkil etildi.
Nazorat davomida:

▪️ elektr tarmoqlarini modernizatsiya qilish;

▪️ energiya samaradorligini oshirish;

▪️ transformator punktlari va elektr uzatish tarmoqlarining texnik holatini yaxshilash;

▪️ tarmoqlardagi yuklamalarni muvozanatlash;

▪️ avariya holatlarining oldini olish;

▪️ tezkor avariya brigadalari faoliyatini takomillashtirish;

▪️ iste’molchilarga xizmat ko‘rsatish sifatini oshirish masalalari tahlil qilindi.

Shuningdek, aholining elektr ta’minoti bilan bog‘liq murojaatlari ko‘rib chiqilib, mavjud muammolarni tezkor bartaraf etish, murojaatlarni belgilangan muddatlarda va sifatli hal etish hamda fuqarolar bilan ochiq muloqotni yanada kuchaytirish yuzasidan fikr almashildi.

Energiya resurslaridan oqilona foydalanish madaniyatini keng targ‘ib qilish, energiya tejamkor texnologiyalarni joriy etish va kuz-qish mavsumiga puxta tayyorgarlik ko‘rish bo‘yicha ham tegishli takliflar bildirildi.

Nazorat yakunida aniqlangan holatlar yuzasidan tegishli tavsiyalar berildi.

Deputatlar tomonidan aholini uzluksiz, barqaror va sifatli elektr energiyasi bilan ta’minlash, qonun hujjatlari ijrosini kuchaytirish hamda fuqarolar manfaatlarini ishonchli himoya qilish deputatlik nazoratining ustuvor yo‘nalishlaridan biri ekani ta’kidlandi.

Bunday amaliy nazorat tadbirlari tashkilotlar faoliyatining samaradorligi va ochiqligini oshirish, mavjud muammolarga o‘z vaqtida yechim topish hamda aholi uchun munosib sharoitlar yaratishga xizmat qiladi.

Xalq manfaatlari yo‘lida — nazorat, tahlil va amaliy natija!