DAVLAT TILI — E’TIBOR VA MAS’ULIYAT MASALASI
O‘zbekiston Respublikasining “Davlat tili haqida”gi Qonuni talablarini hayotga izchil tatbiq etish, davlat tilining nufuzi va mavqeini yanada yuksaltirish, uning xizmat ko‘rsatish sohasidagi amaliy qo‘llanilishini ta’minlash borasida hududlarda tizimli ishlar amalga oshirilmoqda.
O‘zbekiston Respublikasi Vazirlar Mahkamasining 2026-yil 2-yarim yilligiga mo‘ljallangan ish rejasini tasdiqlash to‘g‘risidagi 78-son bayonining 8-ilovasi 16-bandida belgilangan vazifalar ijrosi yuzasidan ishchi guruh tomonidan tuman hududidagi umumiy ovqatlanish shoxobchalarida o‘rganish ishlari olib borildi.
O‘rganishlar davomida mazkur xizmat ko‘rsatish obyektlarida iste’molchilarga taqdim etilayotgan taomnomalarning davlat tilida rasmiylashtirilganligi, taom va ichimliklar nomlarining adabiy til me’yorlariga muvofiq yozilishi hamda iste’molchilarga taqdim etilayotgan axborotning davlat tilida ifodalanganligi holatiga alohida e’tibor qaratildi.
Shuningdek, aniqlangan ayrim kamchiliklarni bartaraf etish, taomnomalarni davlat tilida to‘g‘ri va me’yoriy jihatdan talab darajasida rasmiylashtirish yuzasidan mas’ullarga tegishli tavsiya va tushuntirishlar berildi.
Ta’kidlash joizki, umumiy ovqatlanish va xizmat ko‘rsatish sohasida davlat tilidan to‘g‘ri va o‘rinli foydalanish nafaqat qonunchilik talablarini ta’minlash, balki milliy tilimizga bo‘lgan hurmatni amalda namoyon etishning muhim ko‘rinishidir.
Bunday o‘rganishlar tuman hududida davlat tiliga oid qonunchilik talablariga rioya etilishini ta’minlash, davlat tilining nufuzi va mavqeini mustahkamlash hamda xizmat ko‘rsatish sohasida davlat tilidan foydalanish madaniyatini yuksaltirishga qaratilgan.