Pop tumanida yana bir zamonaviy mahalla binosi foydalanishga topshirildi!

Mustaqilligimizning 35 yilligi arafasida Xalq deputatlari tuman Kengashining 2025-yil 12-dekabrdagi VII-15-125-6-84-K/25-sonli qaroriga asosan Xo‘jaobod mahallasi ahli uchun munosib tuhfa — yangi va zamonaviy mahalla binosi foydalanishga topshirildi.

Yillar davomida eski va noqulay binoda faoliyat yuritgan mahalla faollari endilikda barcha sharoitlarga ega zamonaviy binosida ish boshlaydi.

Tantanali tadbirda mahalla aholisi va nuroniylar ishtirok etdi. Tuman Kengashi deputati, tuman hokimi Gʻulomjon Murodxo‘jayev mahalla ahlini ushbu qutlug‘ ayyom bilan tabriklab, aholi farovonligini ta’minlash yo‘lida yanada faol va astoydil mehnat qilishga chaqirdi.

Ma’lumot uchun: so‘nggi 5 yilda Pop tumanida 35 ta mahalla binosi yangidan qurilib, foydalanishga topshirildi.