Тиллатепа маҳалласида электр таъминотини яхшилаш бўйича ишлар жадал давом этмоқда

Янгиқўрғон тумани Тиллатепа маҳалласида аҳолини барқарор электр энергияси билан таъминлаш, мавжуд тармоқлардаги ортиқча юкламаларни камайтириш ҳамда тадбиркорлик субъектлари учун қулай шарт-шароитлар яратиш мақсадида амалга оширилаётган ишлар ўрганилди.
Дастур доирасида маҳаллада 150 та янги электр таянч устуни ўрнатиш, 3 километр электр тармоғи тортиш ҳамда 2 та трансформатор пункти барпо этиш белгиланган.
Амалга оширилган ишлар натижасида эса режадаги кўрсаткичлар ортиғи билан бажарилиб, 186 та янги электр таянч устуни ўрнатилди, 5 километр электр тармоғи тортилди ҳамда 2 та янги трансформатор пункти ўрнатилди.
Шу тариқа режага нисбатан 36 та қўшимча электр таянч устуни ўрнатилиб, яна 2 километр электр тармоғи тортилди.
Мазкур ишлар маҳаллада электр энергияси таъминоти барқарорлигини ошириш, кучланиш билан боғлиқ муаммоларни камайтириш, аҳоли хонадонлари ва тадбиркорлик субъектларини сифатли электр энергияси билан таъминлашда муҳим аҳамият касб этмоқда.
Объектдаги ишлар билан танишиш жараёнида Халқ депутатлари Наманган вилояти Кенгаши депутатлари Н. Мухамадиева, Д. Хатамова, Кенгаш котибияти мудири Т. Гаппаров ҳамда Янгиқўрғон тумани Кенгаши котибияти мудири М. Эргашева иштирок этди.
Ўрганиш давомида электр таъминотини яхшилаш бўйича амалга оширилаётган ишлар сифати, белгиланган вазифаларнинг ижроси ҳамда аҳоли учун яратилаётган қулайликларга алоҳида эътибор қаратилди.