Xalq deputatlari Pastdarg‘om tumani Kengashining navbatdagi sessiyasi kun tartibiga kiritilgan tumanda yoshlarga oid davlat siyosatining amalga oshirilishi, “Yoshlarga oid davlat siyosati to‘g‘risida”gi Qonun ijrosining ta’minlanishi, bitiruvchilarning oliy ta’lim muassasalariga kirish ko‘rsatkichlarining 2 yillik tahlili hamda ijtimoiy soha obyektlarining kuz-qish mavsumiga tayyorgarligi masalalari yuzasidan hududlarda o‘rganish ishlari davom etmoqda.
Mazkur yo‘nalishlar doirasida Xalq deputatlari Pastdarg‘om tumani Kengashi deputati M.Altibayeva tomonidan Buyuk Turon MFY hududida joylashgan 38-sonli davlat maktabgacha ta’lim tashkilotida o‘rganish ishlari olib borildi.
O‘rganish davomida bog‘chada tarbiyalanayotgan 100 nafar bolaning ta’lim-tarbiyasi uchun yaratilgan shart-sharoitlar, obodonlashtirish ishlari hamda binoning umumiy holati ko‘zdan kechirildi.
Bog‘cha hududida obodonlashtirish ishlari yaxshi yo‘lga qo‘yilgani, shuningdek, binoning 2-qavatidagi eshiklar yangilangani ijobiy baholandi.
Shu bilan birga, o‘rganish davomida binoning ayrim qismlarida ta’mirlash ishlariga ehtiyoj mavjudligi, xususan, 2-qavatda suvoq va bo‘yoq ishlari yakunlanmagani aniqlandi. Mazkur masalalar bo‘yicha amaliy yordam ko‘rsatish zarurligi qayd etildi.
Aniqlangan kamchiliklar va takliflar umumlashtirilib, tegishli tashkilotlarga taqdim etish hamda muammoni bartaraf etish bo‘yicha choralar ko‘rish deputatlik nazoratiga olindi.