Mádeniy miyras obektleri hám olardıń saqlanıw jaǵdayı menen tanıstı

⚡️Ózbekstan Respublikasınıń 2001-jıl 30-avgust kúngi “Mádeniy miyras obektlerin qorǵaw hám olardan paydalaníw haqqında”ǵı 269-II-sanlı Nızamı tiykarında, Xalıq deputatları Shımbay rayonlıq Keńesi sekretariat baslıǵı M.Zarikeev rayondaǵı Mádeniy miyras obektleriniń jumısı hám olardıń saqlanıw jaǵdayı menen tanıstı.

Úyreniw dawamında tariyxıy-mádeniy esteliklerdiń búgingi jaǵdayı, olardı qásterlep saqlaw, ońlaw hám abadanlastırıw jumısları, sonday-aq, ámeldegi nızamshılıq talaplarına ámel etiliwi boyınsha monitoring alıp barıldı.

Juwapkerler menen ushırasıw ótkerilip, mádeniy miyras obektlerin keleshek áwladlarǵa tiykarǵı halında jetkeriw, olardıń tariyxıy kelbetin saqlap qalıw hám turizm potencialın arttırıw máseleleri dodalandı. Sonday-aq, obektlerge keliwshiler ushın jaratılǵan sharayatlar, málimleme kórsetkishleri, sanitariyalıq jaǵday hám infrastrukturanıń búgingi jaǵdayı da kózden ótkerildi.

Deputat úyreniw procesinde anıqlanǵan ayırım kemshiliklerdi saplastırıw, mádeniy miyras obektlerin qorǵaw boyınsha ámelge asırılıp atırǵan jumıslardı bunnan bılay da kúsheytiw, zárúr ońlaw hám abadanlastırıw ilajların jedellestiriw boyınsha tiyisli juwapkerlerge usınıs hám tapsırmalar berdi.

 Sonday-aq, bul obektlerdi keń jámiyetshilikke úgit-násiyatlaw, jaslar arasında tariyxıy miyrasqa húrmet hám itibardı jáne de arttırıw áhmiyetli ekenligi ayrıqsha atap ótildi.