#deputat_soʻrovi #poytaxtdeputatlari #deputatlik_faoliyati

❗️ Deputatlik so‘rovi orqali Yakkasaroy tumanidagi yo‘l harakati xavfsizligi masalalari ko‘tarildi

🏛 Xalq deputatlari Toshkent shahar Kengashi deputati Vasila Alimova tomonidan Yakkasaroy tumani Komil Yashin, Bog‘ibog‘iston hamda Shota Rustaveli ko‘chalarida istiqomat qiluvchi fuqarolarning murojaatlari asosida Toshkent shahar IIBB Yo‘l harakati xavfsizligi boshqarmasi boshlig‘i M.Adilov nomiga deputatlik so‘rovi yuborildi.

📩 Murojaatda mazkur hududlarda yo‘l harakati xavfsizligi yetarli darajada ta’minlanmayotgani, transport vositalarining yuqori tezlikda harakatlanishi oqibatida xavfli vaziyatlar ko‘payib borayotgani hamda bu holat fuqarolar, ayniqsa bolalar, keksalar va piyodalar hayoti uchun jiddiy xavf tug‘dirayotgani qayd etilgan.

🔎 O‘rganishlar davomida aniqlanishicha, mahalla aholisi Komil Yashin ko‘chasida o‘z mablag‘lari hisobidan amaldagi davlat standartlariga muvofiq rezina qoplamali sun’iy notekisliklar o‘rnatgan. Biroq 2026-yil may oyida ushbu sun’iy notekisliklar Yo‘l harakati xavfsizligi xizmati xodimlari tomonidan olib tashlangan. Natijada Komil Yashin va Bog‘ibog‘iston ko‘chalarida transport vositalarining tezligi oshib, yo‘l-transport hodisalari sodir bo‘lish xavfi keskin ortgani hamda mahalla aholisi o‘rtasida asosli xavotirlar yuzaga kelgani ta’kidlangan.

📝 Shu munosabat bilan deputat Vasila Alimova tomonidan “Xalq deputatlari viloyat, tuman va shahar Kengashi deputatining maqomi to‘g‘risida”gi Qonunning 5 va 8-moddalari asosida Toshkent shahar IIBB Yo‘l harakati xavfsizligi boshqarmasi boshlig‘i M.Adilovdan Komil Yashin va Bog‘ibog‘iston ko‘chalarida O‘z DSt 3283:2019 talablari asosida sun’iy notekisliklar, zarur yo‘l belgilari hamda yo‘l chiziqlarini qayta o‘rnatish, Shota Rustaveli ko‘chasida transport harakatining 24/7 tartibi joriy etilgandan keyin yuzaga kelgan transport oqimining ichki mahalla ko‘chalariga ta’sirini kompleks o‘rganish hamda transport oqimini tartibga solish bo‘yicha qo‘shimcha qayrilib olish joylari, tezlikni cheklash vositalari, piyodalar xavfsizligini ta’minlovchi muhandislik inshootlari va zarur yo‘l belgilarini o‘rnatish imkoniyatlarini ko‘rib chiqish so‘raldi.

📋 Deputatlik so‘rovida amalga oshirilgan ishlar, qabul qilingan qarorlar va rejalashtirilayotgan chora-tadbirlar yuzasidan 10 kun muddatda asoslantirilgan yozma ma’lumot taqdim etish talab etilgan.

🤝 Mazkur masala deputat Vasila Alimova tomonidan nazoratga olingan.

📱 Telegram 📱 Instagram 📱 Facebook 📱 YouTube 🔎 E-kengash