Húrmetli Prezidentimiz tárepinen 2026-jılı 22-iyunda «Ózbekstan Respublikasının ayırım nızam hújjetlerine korrupciyaǵa qarsı gúresiw nátiyjeliligin arttırıwǵa, korrupciyaǵa baylanıslı jınayatlar ushın juwapkershiliktiń sózsiz ekenligin támiyinlewge qaratılǵan qosımsha hám ózgerisler kirgiziw haqqında»ǵı 1155-sanlı Nızamı qabıl etildi.
Nızam menen 3 kodeks hám 5 nızamǵa ózgerisler hám qosımshalar kiritilmekte. Sonıń ishidegi Jınayat kodeksinde "korrupciyaǵa baylanıslı jınayatlar" túsinigine anıqlama berilip, oǵan 18 túrdegi jınayatlar kiretuǵını belgileniwi, Nızam menen korrupciyaǵa qarsı gúresiwde eń tómengi turmıslıq korrupciyadan baslap, joqarı dárejedegi lawazımlı shaxslar arasındaǵı jınayatshılıqqa qarsı ámeliy mexanizmler belgileriniń kórsetiliwi xalıq arasında korupsiyaǵa degen túsinigin artıwına alıp keledi.
Korrupciya jáman illet ekenligin bilsekte bul illetke baylanıslı áhmiyetli súrenlerimizdi hárbir mekeme, kárxana, shólkemlerdiń kirer jerine ildirip qoysaqta, biraq sol nársege qol urǵanımızdı nápsimiz sebep sezbey qalamız. Jańa nızamnıń shıǵıwı bul illettiń aldın alıwına, bolmasa sálde bolsa azayıwına sebep boladı dep oylayman. Búgingi kundegi internet tarmaqları en jayǵan bir waqıtta hár birimizdiń qáwipsizligimizdi támiyinlew baslı orında turadı. Sebebi hámme jańalıqtı kitaptan emes internetten alamız hám ondaǵı ayırım háreketlerdi ózlerimizge qolaylastırıp alıwımız arqalı jınayatqa qol urǵanımızdı bilmeyde qalamız. Bular ushın bolsa hesh kimge jaza joq. Sebebi kóplegen korrupciyalıq háreketler social tarmaq arqalı sóylesiwler esabınan da bolıwı múmkin.
            Sonǵı jıllarda mámleketimizde insanlardıń nızamlı huqıqları hám máplerin sózsiz támiyinlewge, puqaralardıń huqıq qorǵaw organlarına degen isenimin asırıwǵa baylanıslı sistemalı jumıslar ámelge asırılmaqta. Máselen hárbir puqaralar jıyınındaǵı profilaktika inspektorları hár sherek sayın xalıqqa islegen jumısları boyınsha esabat berip, onda aymaqta islengen jınayatlardıń túrleri, kimler hám qanday adamlardıń bunday islerge meyillilikleri haqqında esabat beredi. Sol arqalı jınayatlar kim tárepinen qashan bolǵanlıqların bilip aladı. Burınları ata-babalarımızdıń aytqan ráwiyatlarına qaraǵanda jınayat islegen adamdı awıl bolıp, xalıq bolıp tárbiyalaydı eken. Sonlıqtan adamlar ózlerin uslap, jınayat islewden jıraq bolǵan. Biziń búgingi párawan zamanımızda “hámme nárseni pul sheshedi”, - dep oylaymızda ózimiz benen qosa basqanı da jınayatshı etip qoyamız. Sonlıqtan xalıq arasında bul boyınsha túsindiriw, úgit-násiyat jumısların alıp barıw kerek dep oylayman.
            Biz qarap atırǵan nızam, onıń hárbir punkti boyınsha da, huqıq qorǵaw organları tárepinen xalıq arasında túsindiriw jumısların alıp barsaq, túsindiriw jumıslardı bolsa asirese, ayırım huqıqın tolıq bilmeytuǵın kem támiyinlengen shańaraqlar, turmıstan qıynalǵan shańaraqlar, mayıplılıǵı bar adamlar hám hayal-qızlar arasında alıp barsaq, korrupciyanıń aldın alǵan bolar edik.
      Máhallelerde qáwipsiz ortalıqtı jaratıw, huqıqbuzarlıqlardıń aldın alıwda profilaktika inspektorları menen hayal-qızlar máseleleri boyınsha qánigeler birgelikte jumıs alıp barıp, ayına bir mártebe kóshe biylerdi jıynap sóylesiw ilajların ótkeriw arqalı da jınayattıń, hár qıylı huqıqbuzarlıqlardıń aldın alamız dep oylayman. Qosımsha yuridikalıq járdemler de alǵan bolamız, óytkeni korrupciyanı joq qılıwda, jol ashıp beriwde óz qolımızda emespe ?

KARMISOVA Rayxan Atajanovna,

Xalıq deputatları Qaraózek rayonlıq Keńesi 7-Shayxanakópir saylaw okruginen deputat, ÓzXDP deputatlıq toparı aǵzası.