Xalq deputatlari Chilonzor tuman Kengashi deputati Saidova Shukrona To‘xtaevna tomonidan Nafosat mahallasida hokim yordamchilari faoliyati samaradorligi o‘rganildi. Xususan, aholini kambag‘allikdan chiqarish bo‘yicha amalga oshirilayotgan ishlar hamda mahalladagi yoshlar yetakchisi tomonidan tashkil etilayotgan tadbirlar va yoshlar bandligini ta’minlash masalalari atroflicha ko‘rib chiqildi.

Uchrashuv davomida mahalladagi yoshlar bilan bog‘liq masalalar muhokama qilindi. Jumladan, mahallada o‘qish va ish bilan band bo‘lmagan yoshlar bo‘yicha aniq va to‘liq ma’lumotlar mavjud emasligi qayd etildi. Mazkur masala yuzasidan tegishli mutasaddilarga birinchi chorak yakunlari bo‘yicha batafsil hisobot tayyorlash vazifasi yuklatildi.

Shuningdek, hokim yordamchisi tomonidan fuqarolar murojaatlari asosida:

bo‘sh turgan yer maydonini auksion savdolariga chiqarish bo‘yicha amaliy yordam ko‘rsatish,

mahallada mavjud 120 kv.m tayyor ob’ektni mahalla balansiga o‘tkazish masalalari muhokama qilindi.

Yig‘ilishda eng asosiy muammo sifatida mahalla binosi qurilishi masalasi ko‘tarildi. Qurilish ishlarini amalga oshirayotgan tashkilot tomonidan hozirga qadar APP (arxitektura-rejalashtirish topshirig‘i) xulosasi olinmaganligi sababli qurilish ishlari vaqtincha to‘xtab qolgani qayd etildi.

Shuningdek, deputat Nafosat mahallasida yangi qurilayotgan mahalla binosini joyiga chiqib ko‘zdan kechirdi hamda olib borilayotgan ishlarni o‘z nazoratiga oldi.