Tuman Kengashi deputati Asqarali Odilovning navbatdagi saylovchilar bilan uchrashuvi bo‘lib o‘tdi. Muloqot ochiq savol-javob tarzida tashkil etilib, aholi tomonidan bildirilgan taklif va murojaatlar atroflicha muhokama qilindi.

📃Uchrashuv davomida saylovchilar tomonidan bir qator dolzarb muammolar ko‘tarildi. Xususan:

Boyovut tumani istirohat bog‘ini obodonlashtirish hamda hududni xavfsiz maskanga aylantirish (yoritish tizimini yangilash, kuzatuv kameralari o‘rnatish, bolalar maydonchalarini ta’mirlash);

“Sohil” mahallasi aholisini ichimlik suvi bilan ta’minlash, mavjud tarmoqlarni yangilash va qo‘shimcha quduq qazish masalasi;

“Beruniy” mahallasi hududida joylashgan sobiq ixtisoslashtirilgan maktab binosini ta’mirlash, binodan samarali foydalanish va yoshlar uchun qo‘shimcha ta’lim to‘garaklarini yo‘lga qo‘yish.

Ko‘tarilgan masalalar yuzasidan tegishli tashkilotlarga deputat so‘rovi yuborilishi hamda muammolarni amaldagi tartib asosida bosqichma-bosqich bartaraf etish bo‘yicha tegishli choralar ko‘rilishi kelishib olindi.

Shuningdek, deputat tomonidan saylovchilar bilan uchrashuv davomida aholiga O‘zbekiston Respublikasining “Yoshlarga oid davlat siyosati to‘g‘risida”gi Qonuni (O‘RQ-419) mazmun-mohiyati tushuntirildi.

Mazkur qonun yoshlarga oid davlat siyosatining asosiy yo‘nalishlarini belgilab beradi hamda yoshlarning huquq va qonuniy manfaatlarini himoya qilishga qaratilgan muhim huquqiy hujjat hisoblanadi.