MAHALLIY KENGASHLAR HUZURIDAGI EKSPERT GURUHLARI FAOLIYATI

2025-yil 28-yanvardagi O‘zbekiston Respublikasi Oliy Majlisi Senati Kengashining KQ–52–V-sonli qaroriga asosan, xalq deputatlari viloyatlar, Toshkent shahar, tuman va shahar Kengashlari huzurida ekspert guruhlari tashkil etilgan.

Bugungi kunda har bir mahalliy Kengashda mazkur guruhlar shakllantirilgan bo‘lib, ular Kengash va uning doimiy komissiyalari faoliyatini ekspert hamda axborot-tahliliy jihatdan qo‘llab-quvvatlashda muhim o‘rin tutadi. Shuningdek, ular norma ijodkorligi hamda nazorat-tahlil tadbirlarini tayyorlashda asosiy maslahat beruvchi organ hisoblanadi.

🔹 GURUH TARKIBI
Ekspert guruhlari tarkibi:
— viloyat va Toshkent shahar Kengashlari uchun — 20 nafargacha;
— tuman va shahar Kengashlari uchun — 10 nafargacha.

Tarkibga:
— faxriy deputatlar;
— ilmiy va ta’lim muassasalari mutaxassislari;
— jamoatchilik faollari;
— nodavlat notijorat tashkilotlari hamda OAV vakillari jalb qilinadi.

Guruh raisi, o‘rinbosari, kotibi va a’zolari har yili qayta tasdiqlanadi.

🔹 SHAKLLANTIRISHDAGI MUHIM TALABLAR
Ekspert guruhlarini shakllantirishda manfaatlar to‘qnashuviga yo‘l qo‘ymaslik muhim hisoblanadi.
Xususan, ijro etuvchi hokimiyat organlarining rahbar va mas’ul xodimlarini jalb qilmaslik maqsadga muvofiq.
Bu esa guruh faoliyatining xolis va samarali bo‘lishini ta’minlaydi.

🔹 ASOSIY VAZIFALAR
Ekspert guruhlari quyidagi vazifalarni amalga oshiradi:
— Kengash sessiyasi kun tartibiga kiritilgan masalalarni dastlabki ko‘rib chiqishda ishtirok etish;
— qarorlar loyihalarini qonunchilik va islohotlar talablari asosida tahlil qilish;
— korrupsiya, gender tenglik va tadbirkorlikka to‘sqinlik qiluvchi holatlarni aniqlash;
— nazorat-tahlil tadbirlarini tashkil etishda komissiyalarga ko‘maklashish;
— xalqaro tajribani o‘rganish va amaliyotga joriy etish bo‘yicha takliflar berish;
— deputatlar va jamoatchilik institutlari bilan hamkorlikni rivojlantirish;
— davlat va hududiy dasturlar loyihalari yuzasidan tavsiyalar berish;
— uchrashuvlar, murojaatlar va tadbirlarda amaliy ko‘mak ko‘rsatish.

🔹 EKSPERT GURUHI A’ZOLARINING HUQUQLARI
Ekspert guruhi a’zolari:
— zarur axborotlarni olish;
— Kengash va komissiya majlislarida ishtirok etish;
— o‘z fikr va takliflarini bildirish;
— ishchi guruhlar bilan hamkorlikda o‘rganishlar o‘tkazish;
— kerakli materiallarni so‘rab olish huquqiga ega.

🔹 BOSHQARUV VA RAG‘BATLANTIRISH
Nizomga muvofiq, mahalliy Kengash raisi ekspert guruhi faoliyatiga rahbarlik qiladi hamda a’zolar faoliyatini baholab boradi.
Faol a’zolar rag‘batlantirilishi, sust ishlayotganlari esa bosqichma-bosqich yangilanishi mumkin. Zarur hollarda guruh tarkibi yil davomida ham o‘zgartiriladi.

🔹 XULOSA
Ekspert guruhlarini shakllantirishda deputatlar tarkibi ham inobatga olinishi zarur. Agar muayyan sohada mutaxassislar yetishmasa, ushbu yo‘nalish bo‘yicha ekspertlarni jalb qilish maqsadga muvofiq hisoblanadi.

Bu esa mahalliy Kengashlar faoliyati samaradorligini yanada oshirishga xizmat qiladi.