Xalq deputatlari Zarbdor tuman Kengashiga 13-Sharq yulduzi saylov okrugidan saylangan deputat Maxfuza Isroilova hamda tuman Sanitariya-epidemiologik osoyishtalik va jamoat salomatligi (SES) bo‘limi xodimi hamkorligida "Sharq yulduzi" mahallasida nazorat tadbiri o‘tkazildi.
O‘rganishlar davomida hududdagi maishiy chiqindilarni olib chiqib ketish hamda hududning sanitariya holati talab darajasida emasligi, ya’ni chiqindilar to‘planib qolib, noqonuniy chiqindixonalarga aylanib borayotgani va achinarli ahvolga kelib qolgani aniqlandi.
Ushbu holat hududda sanitariya-epidemiologik barqarorlikka hamda aholi salomatligiga salbiy ta’sir ko‘rsatishi mumkinligini inobatga olgan holda:
Mavjud muammoni bartaraf etish va chiqindilarni o‘z vaqtida olib chiqib ketishni ta’minlash bo‘yicha mas’ul korxonaga deputatlik so‘rovi yuborilishi belgilandi;
Hududiy SES xodimi bilan birgalikda sanitariya qoidalariga rioya etilishi yuzasidan mas’ullarga ko‘rsatmalar berildi.