Jamoat xavfsizligi va voyaga yetmaganlar bilan ishlash holati o‘rganildi

Xalq deputatlari Qo‘shko‘pir tumani Kengashi deputati Intizor Abdullayeva Kenagas mahallasida bo‘lib, mahalla raisi Shodlik Quriyozov hamrohligida o‘ziga biriktirilgan tashkilot — tuman Ichki ishlar bo‘limi xodimlari faoliyati bilan yaqindan tanishdi.

O‘rganish davomida tuman ichki ishlar bo‘limi psixologi Bekzod Sa’dullayevning faoliyati, ayniqsa tarbiyasi og‘ir va alohida e’tiborga muhtoj voyaga yetmaganlar bilan olib borilayotgan profilaktik hamda tarbiyaviy ishlar holatiga e’tibor qaratildi.

Shuningdek, mahalla profilaktika inspektori Qudrat Saidovning xizmat faoliyati o‘rganilib, hududda jinoyatchilik va huquqbuzarliklarning oldini olish, fuqarolar osoyishtaligini ta’minlash, shuningdek, mahallalarni yashil, sariq va ko‘k toifalarga ajratish asosida manzilli profilaktik tadbirlarni tashkil etish borasidagi ishlar tahlil qilindi.

Deputatlik nazorati davomida aholining, ayniqsa yoshlarning huquqiy madaniyatini yuksaltirish, tarbiyasi og‘ir voyaga yetmaganlar bilan individual ishlashni kuchaytirish hamda jinoyatchilikning barvaqt oldini olish masalalari muhim vazifa sifatida qayd etildi.