O‘zbekiston Respublikasi Oliy Majlisi Senati Kengashining 2025-yil 26-fevraldagi KQ-102-V-son "Xalq deputatlari viloyat, tuman va shahar Kengashlari huzurida Yoshlar maslahat guruhini tashkil etish to‘g‘risida"gi qarori ijrosini ta’minlash hamda mazkur qaror asosida Xalq deputatlari Chilonzor tumani Kengashining 2025-yil 28-maydagi III-9-41-14-204-K/25-son "Xalq deputatlari Chilonzor tumani Kengashi huzurida Yoshlar maslahat guruhini tashkil qilish to‘g‘risida"gi qaroriga muvofiq, Chilonzor tumani Kengashi huzurida Yoshlar maslahat guruhi tashkil etilgan.

Mazkur guruh faoliyati yoshlarning huquq va qonuniy manfaatlarini himoya qilish, ularning muammo va ehtiyojlarini tizimli o‘rganish, davlat organlari hamda tashkilotlar bilan hamkorlikni kuchaytirish, yoshlar tomonidan ilgari surilayotgan taklif va tashabbuslarni qo‘llab-quvvatlash, shuningdek, ularning bandligini ta’minlashga ko‘maklashishga qaratilgan.

Ushbu vazifalar ijrosini ta’minlash maqsadida Chilonzor tumani Yoshlar ishlari bo‘limi hamda mahallalardagi Yoshlar yetakchilari bilan hamkorlikda bitiruvchi yoshlar ishtirokida manzilli uchrashuv va ochiq muloqotlar muntazam ravishda tashkil etilmoqda.

Uchrashuvlar davomida bitiruvchi yoshlarning bandlik masalalari, kasb tanlash, oliy ta’lim muassasalarida tahsil olish istagi, tadbirkorlik faoliyatini yo‘lga qo‘yish imkoniyatlari hamda ularni qiynayotgan dolzarb muammolar o‘rganilib, har bir murojaat yuzasidan amaliy yechimlar ishlab chiqish va tegishli mutasaddi tashkilotlar bilan hamkorlikda zarur choralarni ko‘rish ishlari amalga oshirilmoqda.