Navoiy shahridagi avtobus bekatlarining holati joyiga chiqqan holda o‘rganildi

Xalq deputatlari Navoiy shahar Kengashi kotibiyati mudiri Jo‘rabek Hafizov hamda kotibiyat bosh mutaxassisi Diyorbek Toyirovlar tomonidan Navoiy shahri hududidagi jamoat transporti avtobus bekatlarining holati joyiga chiqqan holda o‘rganildi.

O‘rganish jarayonida avtobus bekatlarining sanitariya-gigiyena holati, texnik sozligi, yo‘lovchilar uchun yaratilgan qulayliklar, axborot lavhalarining mavjudligi hamda obodonlashtirish ishlari holatiga alohida e’tibor qaratildi.

Shuningdek, aniqlangan kamchiliklar yuzasidan mas’ul tashkilotlar vakillari bilan fikr almashilib, ularni bartaraf etish bo‘yicha tegishli taklif va tavsiyalar bildirildi. Mavjud muammolarni qisqa muddatlarda hal etish hamda jamoat transporti infratuzilmasini yanada takomillashtirish yuzasidan zarur choralarni ko‘rish belgilab olindi.

Mazkur o‘rganishlar aholiga ko‘rsatilayotgan transport xizmatlari sifatini oshirish, yo‘lovchilar uchun xavfsiz va qulay sharoitlarni yaratish hamda shaharning obod qiyofasini ta’minlashga xizmat qiladi.

Kelgusida ham bu kabi monitoring tadbirlari izchil davom ettirilib, aniqlangan muammolarni bartaraf etish bo‘yicha tegishli tashkilotlar bilan hamkorlikda amaliy ishlar olib boriladi.