Yaqinda Xalq deputatlari Ishtixon tumani Kengashi deputati tomonidan Saroy qishlog‘i aholisining turmush sharoitlari o‘rganildi. O‘rganishlar davomida yoshlar uchun zarur bo’lgan— workout sport maydonchasining yo‘qligi aniqlandi. Bu maydoncha yoshlar uchun sog‘lom turmush tarzi, jismoniy chiniqish va bo‘sh vaqtni mazmunli o‘tkazishda katta ahamiyat kasb etadi.

Aholi bu boradagi taklifni bir necha marotaba ilgari surgan. Qolaversa, ushbu sport maydonchasi uchun joy ham tayyorlab qo‘yilgan, hattoki uning atrofini devor bilan o‘rash ishlari ham amalga oshirilgan. Demak, boshlang‘ich infratuzilma bor, faqatgina zarur jihozlar – sport jihozlarini o‘rnatish qolmoqda.

Mahalla yoshlari kutishda, tuman mutasaddilari esa sukut saqlashda davom etmoqda. Qishloqda sport zallari yo‘qligi, bo‘sh vaqtni foydali o‘tkazish imkoniyatlarining cheklanganligi yoshlar orasida faoliyatsizlik va salbiy illatlarga olib kelmasligiga kim kafolat bera oladi?

Bu faqat sport emas — bu yosh avlod salomatligi, kelajagi, intizomi va ijtimoiy faolligi bilan bog‘liq muammo. Saroy qishlog’i yoshlari ko‘chada bekor yurishni emas, sog‘lom hayot tarzini tanlagan. 

Xulosa o‘rnida savol:

Agar joy tayyor, devor tortilgan bo‘lsa — nega sport jihozlari hali ham o‘rnatilmadi? Nega bu kichik, ammo muhim tashabbus to‘liq amalga oshirilmayapti? Mahalla aholisining istagi yana qog‘ozda qoladimi?

Tuman mutasaddilaridan masalaga befarq bo‘lmaslik, deputatlarning tashabbusini qo‘llab-quvvatlab, tez fursatda amaliy harakatlar boshlashlarini kutib qolamiz. Axir bu masala ortida bir mahalla avlodining sog‘lom kelajagi turibdi!